nam sunta hun tera jab bhare sansar ke bich

naam suntā huuñ tirā jab bhare sansār ke biich

lafz ruk jaate haiñ aa kar mirī guftār ke biich

ek hī chehra kitābī nazar aatā hai hameñ

kabhī ash.ār ke bāhar kabhī ash.ār ke biich

ek dil TuuTā magar kitnī naqābeñ palTīñ

jiit ke pahlū nikal aa.e ka.ī haar ke biich

koī mahfil ho nazar us kī hamīñ par Thahrī

kabhī apnoñ meñ satāyā kabhī aġhyār ke biich

aise zāhid kī qayādat meñ to tauba tauba

kabhī īmān kī bāteñ kabhī kuffār ke biich

kabhī tahzīb-o-tamaddun kā ye markaz thā miyāñ

tum ko bastī jo nazar aatī hai āsār ke biich

jis tarah TaaT kā paivand ho maḳhmal meñ 'adīl'

maġhribī chāl-chalan mashriqī aqdār ke biich

nam sunta hun tera jab bhare sansar ke bich

lafz ruk jate hain aa kar meri guftar ke bich

ek hi chehra kitabi nazar aata hai hamein

kabhi ashaar ke bahar kabhi ashaar ke bich

ek dil TuTa magar kitni naqaben palTin

jit ke pahlu nikal aae kai haar ke bich

koi mahfil ho nazar us ki hamin par Thahri

kabhi apnon mein sataya kabhi aghyar ke bich

aise zahid ki qayaadat mein to tauba tauba

kabhi iman ki baaten kabhi kuffar ke bich

kabhi tahzib-o-tamaddun ka ye markaz tha miyan

tum ko basti jo nazar aati hai aasar ke bich

jis tarah TaT ka paiwand ho maKHmal mein 'adil'

maghribi chaal-chalan mashriqi aqdar ke bich