nasazi-e-haalat ne dil toD diya hai

nāsāzī-e-hālāt ne dil toḌ diyā hai

duniyā kī har ik baat ne dil toḌ diyā hai

kuchh sāqi-e-mahfil bhī rahā rindoñ se barham

kuchh shiddat-e-āfāt ne dil toḌ diyā hai

āġhāz-e-mulāqāt meñ kyā josh thā dil meñ

anjām-e-mulāqāt ne dil toḌ diyā hai

behāl-o-pareshāñ hai bashar roz-e-azal se

farsūda rivāyāt ne dil toḌ diyā hai

apnoñ kī ināyāt kā ham zikr kareñ kyā

apnoñ kī ināyāt ne dil toḌ diyā hai

kal aap kī har baat se taskīn milī thī

aaj aap kī har baat ne dil toḌ diyā hai

ham tishna-dahan baiThe haiñ maiḳhāne maiñ 'āsī'

umḌī huī barsāt ne dil toḌ diyā hai

nasazi-e-haalat ne dil toD diya hai

duniya ki har ek baat ne dil toD diya hai

kuchh saqi-e-mahfil bhi raha rindon se barham

kuchh shiddat-e-afat ne dil toD diya hai

aaghaz-e-mulaqat mein kya josh tha dil mein

anjam-e-mulaqat ne dil toD diya hai

behaal-o-pareshan hai bashar roz-e-azal se

farsuda riwayat ne dil toD diya hai

apnon ki inayat ka hum zikr karen kya

apnon ki inayat ne dil toD diya hai

kal aap ki har baat se taskin mili thi

aaj aap ki har baat ne dil toD diya hai

hum tishna-dahan baiThe hain maiKHane main 'asi'

umDi hui barsat ne dil toD diya hai