naw kaghaz ki sahi kuchh to nazar se guzre

naav kāġhaz kī sahī kuchh to nazar se guzre

us se pahle ki ye paanī mire sar se guzre

phir samā.at ko atā kar jaras-e-gul kī sadā

qāfila phir koī is rāhguzar se guzre

koī dastak na sadā koī tamannā na talab

ham ki darvesh the yuuñ bhī tire dar se guzre

ġhairat-e-ishq to kahtī hai ki ab aañkh na khol

is ke ba.ad ab na koī aur idhar se guzre

maiñ to chāhūñ vo sar-e-dasht Thahar hī jaa.e

par vo sāvan kī ghaTā jaisā hai barse guzre

habs kī rut meñ koī taaza havā kā jhoñkā

bād-o-bārāñ ke ḳhudā mere bhī ghar se guzre

mujh ko mahfūz rakhā hai mire chhoTe qad ne

jitne patthar idhar aa.e mire sar se guzre

naw kaghaz ki sahi kuchh to nazar se guzre

us se pahle ki ye pani mere sar se guzre

phir samaat ko ata kar jaras-e-gul ki sada

qafila phir koi is rahguzar se guzre

koi dastak na sada koi tamanna na talab

hum ki darwesh the yun bhi tere dar se guzre

ghairat-e-ishq to kahti hai ki ab aankh na khol

is ke baad ab na koi aur idhar se guzre

main to chahun wo sar-e-dasht Thahar hi jae

par wo sawan ki ghaTa jaisa hai barse guzre

habs ki rut mein koi taza hawa ka jhonka

baad-o-baran ke KHuda mere bhi ghar se guzre

mujh ko mahfuz rakha hai mere chhoTe qad ne

jitne patthar idhar aae mere sar se guzre