naw tufan mein jab zer-o-zabar hoti hai

naav tūfān meñ jab zer-o-zabar hotī hai

nāḳhudā par kabhī maujoñ pe nazar hotī hai

duur hai manzil-e-maqsūd safar hai darpesh

sone vāloñ ko jagā do ki sahar hotī hai

aur baḌh jaatī hai kuchh quvvat-e-ehsās-e-amal

jitnī dushvār mirī rāh-guzar hotī hai

ghar ke chhuTne kā asar ālam-e-ġhurbat kā ḳhayāl

kaifiyat dil kī ajab vaqt-e-safar hotī hai

kyā guzartī hai guloñ par koī un se pūchhe

naam gulshan kā hai kāñToñ pe basar hotī hai

azm kahtā hai mirā maiñ bhī to dekhūñ āḳhir

kaun sī hai vo muhim jo nahīñ sar hotī hai

kaun kahtā hai ġharīb-ul-vatanī meñ 'sāqī'

saath le-de ke faqat gard-e-safar hotī hai

naw tufan mein jab zer-o-zabar hoti hai

naKHuda par kabhi maujon pe nazar hoti hai

dur hai manzil-e-maqsud safar hai darpesh

sone walon ko jaga do ki sahar hoti hai

aur baDh jati hai kuchh quwwat-e-ehsas-e-amal

jitni dushwar meri rah-guzar hoti hai

ghar ke chhuTne ka asar aalam-e-ghurbat ka KHayal

kaifiyat dil ki ajab waqt-e-safar hoti hai

kya guzarti hai gulon par koi un se puchhe

nam gulshan ka hai kanTon pe basar hoti hai

azm kahta hai mera main bhi to dekhun aaKHir

kaun si hai wo muhim jo nahin sar hoti hai

kaun kahta hai gharib-ul-watani mein 'saqi'

sath le-de ke faqat gard-e-safar hoti hai