nae fitnon ke har jaanib se itne sar nikal aae

na.e fitnoñ ke har jānib se itne sar nikal aa.e

zamīñ par jis tarah sabza namī pā kar nikal aa.e

bahut hoshiyār logo is na.ī tārīḳh ke hāthoñ

na jaane kab tumhārā ghar kisī kā ghar nikal aa.e

kahīñ ke phūl-patte haiñ kahīñ ke phal kahīñ ke haiñ

kuchh aise peḌ bhī bhārat kī dhartī par nikal aa.e

dar-e-taqdīs ko jab vā kiyā to qasr-e-hurmat se

batā.ūñ kyā tumheñ ki kitne saudāgar nikal aa.e

tumhārā aur tumhāre nazm kā us roz kyā hogā

kabhī sochā hai dīvāroñ meñ jis din dar nikal aa.e

'sa.ādat' aap is dīda-varoñ kī bhiiḌ meñ DhūñDheñ

bahut mumkin hai un meñ koī dīda-var nikal aa.e

nae fitnon ke har jaanib se itne sar nikal aae

zamin par jis tarah sabza nami pa kar nikal aae

bahut hoshiyar logo is nai tariKH ke hathon

na jaane kab tumhaara ghar kisi ka ghar nikal aae

kahin ke phul-patte hain kahin ke phal kahin ke hain

kuchh aise peD bhi bhaarat ki dharti par nikal aae

dar-e-taqdis ko jab wa kiya to qasr-e-hurmat se

bataun kya tumhein ki kitne saudagar nikal aae

tumhaara aur tumhaare nazm ka us roz kya hoga

kabhi socha hai diwaron mein jis din dar nikal aae

'saadat' aap is dida-waron ki bhiD mein DhunDhen

bahut mumkin hai un mein koi dida-war nikal aae