nae paikar nae sanche mein Dhalna chahta hun main

na.e paikar na.e sāñche meñ Dhalnā chāhtā huuñ maiñ

mizāj-e-zindagī yaksar badalnā chāhtā huuñ maiñ

zamīñ terī kashish ne rok rakkhā hai mujhe varna

hudūd-e-ḳhāk se bāhar nikalnā chāhtā huuñ maiñ

numū kā josh Thokar mārtā rahtā hai siine meñ

lahū kā chashma huuñ kab se ubalnā chāhtā huuñ maiñ

guzarte jā rahe haiñ qāfile tū hī zarā ruk jā

ġhubār-e-rāh tere saath chalnā chāhtā huuñ maiñ

maiñ apne barf ke paikar se ḳhud uktā gayā huuñ ab

chamak mujh par mire sūraj pighalnā chāhtā huuñ meñ

sadā.eñ dasht detā hai mujhe vahshat bulātī hai

so ḳhāk-e-ishq apne sar pe malnā chāhtā huuñ maiñ

idhar se bhī koī guzre ki maiñ jis se kahūñ 'aslam'

charāġh-e-rahguzar huuñ aur jalnā chāhtā huuñ maiñ

nae paikar nae sanche mein Dhalna chahta hun main

mizaj-e-zindagi yaksar badalna chahta hun main

zamin teri kashish ne rok rakkha hai mujhe warna

hudud-e-KHak se bahar nikalna chahta hun main

numu ka josh Thokar marta rahta hai sine mein

lahu ka chashma hun kab se ubalna chahta hun main

guzarte ja rahe hain qafile tu hi zara ruk ja

ghubar-e-rah tere sath chalna chahta hun main

main apne barf ke paikar se KHud ukta gaya hun ab

chamak mujh par mere suraj pighalna chahta hun mein

sadaen dasht deta hai mujhe wahshat bulati hai

so KHak-e-ishq apne sar pe malna chahta hun main

idhar se bhi koi guzre ki main jis se kahun 'aslam'

charagh-e-rahguzar hun aur jalna chahta hun main