nafas na anjuman-e-arzu se bahar khinch

nafas na anjuman-e-ārzū se bāhar khīñch

agar sharāb nahīñ intizār-e-sāġhar khīñch

kamāl-e-garmī-e-sa.ī-e-talāsh-e-dīd na pūchh

ba-rañg-e-ḳhār mire aa.ine se jauhar khīñch

tujhe bahāna-e-rāhat hai intizār ai dil

kiyā hai kis ne ishārā ki nāz-e-bistar khīñch

tirī taraf hai ba-hasrat nazāra-e-nargis

ba-korī-e-dil-o-chashm-e-raqīb sāġhar khīñch

ba-nīm-ġhamza adā kar haq-e-vadī.at-e-nāz

niyām-e-parda-e-zaḳhm-e-jigar se ḳhanjar khīñch

mire qadah meñ hai sahbā-e-ātish-e-pinhāñ

ba-rū-e-sufra kabāb-e-dil-e-samandar khīñch

na kah ki tāqat-e-rusvā.ī-e-visāl nahīñ

agar yahī araq-e-fitna hai mukarrar khīñch

junūn-e-ā.ina mushtāq-e-yak-tamāshā hai

hamāre safhe pe bāl-e-parī se mistar khīñch

ḳhumār-e-minnat-e-sāqī agar yahī hai 'asad'

Dil-e-gudāḳhta ke mai-kade meñ sāġhar khīñch

nafas na anjuman-e-arzu se bahar khinch

agar sharab nahin intizar-e-saghar khinch

kamal-e-garmi-e-sai-e-talash-e-did na puchh

ba-rang-e-KHar mere aaine se jauhar khinch

tujhe bahana-e-rahat hai intizar ai dil

kiya hai kis ne ishaara ki naz-e-bistar khinch

teri taraf hai ba-hasrat nazara-e-nargis

ba-kori-e-dil-o-chashm-e-raqib saghar khinch

ba-nim-ghamza ada kar haq-e-wadiat-e-naz

niyam-e-parda-e-zaKHm-e-jigar se KHanjar khinch

mere qadah mein hai sahba-e-atish-e-pinhan

ba-ru-e-sufra kabab-e-dil-e-samandar khinch

na kah ki taqat-e-ruswai-e-visal nahin

agar yahi araq-e-fitna hai mukarrar khinch

junun-e-aina mushtaq-e-yak-tamasha hai

hamare safhe pe baal-e-pari se mistar khinch

KHumar-e-minnat-e-saqi agar yahi hai 'asad'

Dil-e-gudaKHta ke mai-kade mein saghar khinch