nafas nafas mein tera ehtiram le ke chale

nafas nafas meñ tirā ehtirām le ke chale

jahāñ jahāñ bhī chale terā naam le ke chale

ruḳh-e-sabīh pe lahrā.ī haiñ siyah zulfeñ

tulū-e-sub.h meñ vo husn-e-shām le ke chale

samajhtā kaun bahāroñ ke in ishāroñ ko

vo ek ham the jo mahfil meñ jaam le ke chale

ba-nām-e-pīr-e-muġhāñ tishna-lab rahe barsoñ

ab ek daur hamārā bhī naam le ke chale

vufūr-e-shauq meñ apnā to ab ye aalam hai

ki dil meñ yaad tirī lab pe naam le ke chale

qadam qadam pe 'qamar' un kī yaad aa.ī hai

zahe nasīb ġham-e-nā-tamām le ke chale

nafas nafas mein tera ehtiram le ke chale

jahan jahan bhi chale tera nam le ke chale

ruKH-e-sabih pe lahrai hain siyah zulfen

tulu-e-subh mein wo husn-e-sham le ke chale

samajhta kaun bahaaron ke in ishaaron ko

wo ek hum the jo mahfil mein jam le ke chale

ba-nam-e-pir-e-mughan tishna-lab rahe barson

ab ek daur hamara bhi nam le ke chale

wufur-e-shauq mein apna to ab ye aalam hai

ki dil mein yaad teri lab pe nam le ke chale

qadam qadam pe 'qamar' un ki yaad aai hai

zahe nasib gham-e-na-tamam le ke chale