nafrat hai faza mein to mohabbat bhi bahut hai

nafrat hai fazā meñ to mohabbat bhī bahut hai

jiine ke liye dard kī daulat bhī bahut hai

hai dast-e-sitam-gar ko agar fursat-e-āzār

dukhiyāroñ meñ dukh sahne kī himmat bhī bahut hai

kuchh sham.a ki hai husn-e-jahāñ-soz kā jaadū

parvānoñ meñ kuchh shauq-e-shahādat bhī bahut hai

mā.il-ba-karam bhī huā karte haiñ vo aksar

ta.azīr-pasand apnī tabī.at bhī bahut hai

haiñ qatl pe āmāda hama-vaqt vo us ke

jis ke liye āñkhoñ meñ muravvat bhī bahut hai

ab dast-e-masīhā kī karāmāt haiñ vo chand

marham bhī hai sāmān-e-jarāhat bhī bahut hai

nafrat hai faza mein to mohabbat bhi bahut hai

jine ke liye dard ki daulat bhi bahut hai

hai dast-e-sitam-gar ko agar fursat-e-azar

dukhiyaron mein dukh sahne ki himmat bhi bahut hai

kuchh shama ki hai husn-e-jahan-soz ka jadu

parwanon mein kuchh shauq-e-shahadat bhi bahut hai

mail-ba-karam bhi hua karte hain wo aksar

tazir-pasand apni tabiat bhi bahut hai

hain qatl pe aamada hama-waqt wo us ke

jis ke liye aankhon mein murawwat bhi bahut hai

ab dast-e-masiha ki karamat hain wo chand

marham bhi hai saman-e-jarahat bhi bahut hai