nagar mein rahte the lekin gharon se dur rahe

nagar meñ rahte the lekin gharoñ se duur rahe

ajiib log the jo dilbaroñ se duur rahe

duā.eñ māñgte phirte haiñ log galiyoñ meñ

matā-e-hosh hamāre saroñ se duur rahe

ye log kīmiyā-gar haiñ parakh na leñ ham ko

ye baat soch ke vo be-zaroñ se duur rahe

matā-e-dard luTāte rahe zamāne meñ

ham ahl-e-dard the saudāgaroñ se duur rahe

girūñ zamīn pe maiñ TuuT kar sitārā sā

magar sukūn kī ḳhvāhish paroñ se duur rahe

nikal ke ḳhud se shanāsā.ī kī nazar DhūñDo

jo log ghar meñ rahe dūsroñ se duur rahe

badan hai shīshe ke mānind vaqt kā iqbāl

use batāo ki ham pattharoñ se duur rahe

nagar mein rahte the lekin gharon se dur rahe

ajib log the jo dilbaron se dur rahe

duaen mangte phirte hain log galiyon mein

mata-e-hosh hamare saron se dur rahe

ye log kimiya-gar hain parakh na len hum ko

ye baat soch ke wo be-zaron se dur rahe

mata-e-dard luTate rahe zamane mein

hum ahl-e-dard the saudagaron se dur rahe

girun zamin pe main TuT kar sitara sa

magar sukun ki KHwahish paron se dur rahe

nikal ke KHud se shanasai ki nazar DhunDo

jo log ghar mein rahe dusron se dur rahe

badan hai shishe ke manind waqt ka iqbaal

use batao ki hum pattharon se dur rahe