nagar mein sham ho gai hai kahish-e-maash mein

nagar meñ shaam ho ga.ī hai kāhish-e-ma.āsh meñ

zamīñ pe phir rahe haiñ log rizq kī talāsh meñ

guzar ga.ī tamām umr is hisār-e-tang meñ

kashish hai ik marīz sī makāñ kī būd-o-bāsh meñ

hilāl harf-e-ḳhauf sā fasīl-e-sang-e-nīl par

yā hai adam kā zard rañg ḳhvāhish-e-ḳharāsh meñ

chamak rahe haiñ ta.aziye balā kī tez dhuup meñ

mahak hai āb-e-marg kī fishār-e-arq-pāsh meñ

'munīr' husn-e-bātinī ko koī dekhtā nahīñ

matā-e-chashm kho ga.ī libās kī tarāsh meñ

nagar mein sham ho gai hai kahish-e-maash mein

zamin pe phir rahe hain log rizq ki talash mein

guzar gai tamam umr is hisar-e-tang mein

kashish hai ek mariz si makan ki bud-o-bash mein

hilal harf-e-KHauf sa fasil-e-sang-e-nil par

ya hai adam ka zard rang KHwahish-e-KHarash mein

chamak rahe hain taziye bala ki tez dhup mein

mahak hai aab-e-marg ki fishaar-e-arq-pash mein

'munir' husn-e-baatini ko koi dekhta nahin

mata-e-chashm kho gai libas ki tarash mein