nagar yaqin ka shahr-e-guman se aage hai

nagar yaqīn kā shahr-e-gumāñ se aage hai

jahāñ hamārā tumhāre jahāñ se aage hai

shikam meñ bhuuk paroñ meñ havā.eñ rakh taa.ir

bahut sā rizq abhī āsmāñ se aage hai

maiñ bhuul baiThā huuñ apnī talāsh meñ ye bhī

mirā vajūd mire dasht-e-jāñ se aage hai

tujhe talāsh-e-ḳhizar hai tū aa yahāñ se guzar

jahān-e-ḳhizr mire ḳhāk-dāñ se aage hai

ho jis ko dasht meñ hāsil qarābat-e-zaiġham

vahī ġhazāl hujūm-e-sagāñ se aage hai

mujhe bhī luuTā gayā hai baḌe salīqe se

mirā bhī zikr tirī dāstāñ se aage hai

zamīn pe huuñ magar huuñ falak-navard aisā

ki jis kā paañv sar-e-kahkashāñ se aage hai

isī liye to ta.āqub meñ hai charāġh-e-falak

ki merā saaya mire kārvāñ se aage hai

yahāñ jo ḳhud ko samajhtā nahīñ hadaf 'ādil'

usī kā tiir giraft-e-kamāñ se aage hai

nagar yaqin ka shahr-e-guman se aage hai

jahan hamara tumhaare jahan se aage hai

shikam mein bhuk paron mein hawaen rakh tair

bahut sa rizq abhi aasman se aage hai

main bhul baiTha hun apni talash mein ye bhi

mera wajud mere dasht-e-jaan se aage hai

tujhe talash-e-KHizar hai tu aa yahan se guzar

jahan-e-KHizr mere KHak-dan se aage hai

ho jis ko dasht mein hasil qarabat-e-zaigham

wahi ghazal hujum-e-sagan se aage hai

mujhe bhi luTa gaya hai baDe saliqe se

mera bhi zikr teri dastan se aage hai

zamin pe hun magar hun falak-naward aisa

ki jis ka panw sar-e-kahkashan se aage hai

isi liye to taaqub mein hai charagh-e-falak

ki mera saya mere karwan se aage hai

yahan jo KHud ko samajhta nahin hadaf 'adil'

usi ka tir giraft-e-kaman se aage hai