naghma jo mahmil ke bahar hai wahi mahmil mein hai

naġhma jo mahmil ke bāhar hai vahī mahmil meñ hai

haal meñ zāhir hai poshīda jo mustaqbil meñ hai

jis kā partav gesū-e-shab meñ mah-e-kāmil meñ hai

ik jhalak us husn-e-poshīda kī tere dil meñ hai

jalva-e-yazdāñ bhī raqs-e-ahraman bhī dil meñ hai

aadmī bhī kis qadar uljhan meñ hai mushkil meñ hai

kah rahā thā ek dīvāna ye hañgām-e-safar

rah-navardī meñ jo rāhat hai vahī manzil meñ hai

hausla-mandān ġhavvāsān-e-dariyā ke liye

zindagī maujoñ meñ hai jo vo kahāñ sāhil meñ hai

apnī fitrat par chaman meñ ḳhār-o-gul to haiñ magar

ik tazād-e-mustaqil is musht-e-āb-o-gil meñ hai

jaam hai miinā hai sahbā-e-junūñ-afzā bhī hai

sāqiyā aa jā ki ik terī kamī mahfil meñ hai

be-rah-o-be-rahnumā garm-e-safar hai qāfila

fā.eda kyā is tarah kī sa.i-e-lā-hāsil meñ hai

paikar-e-shauq-o-talab ban kar jo hai garm-e-safar

har qadam us rāh-rau kā sarhad-e-manzil meñ hai

marja.a-e-ilhām ban saktā hai koshish ho agar

ik maqām aisā bhī pinhāñ aadmī ke dil meñ hai

āftāb-e-dil se garmā aur chamkā de use

zarra-e-haq jo nihāñ gard-e-rah-e-bātil meñ hai

dil to hai nā-āshnā-e-bāda-hā-e-zindagī

jām-o-mīnā kā magar saudā sar-e-ġhāfil meñ hai

DhūñDte rahiye magar 'amjad' ko pā sakte nahīñ

vo to ab ik nuur ke dariyā-e-be-sāhil meñ he

naghma jo mahmil ke bahar hai wahi mahmil mein hai

haal mein zahir hai poshida jo mustaqbil mein hai

jis ka partaw gesu-e-shab mein mah-e-kaamil mein hai

ek jhalak us husn-e-poshida ki tere dil mein hai

jalwa-e-yazdan bhi raqs-e-ahraman bhi dil mein hai

aadmi bhi kis qadar uljhan mein hai mushkil mein hai

kah raha tha ek diwana ye hangam-e-safar

rah-nawardi mein jo rahat hai wahi manzil mein hai

hausla-mandan ghawwasan-e-dariya ke liye

zindagi maujon mein hai jo wo kahan sahil mein hai

apni fitrat par chaman mein KHar-o-gul to hain magar

ek tazad-e-mustaqil is musht-e-ab-o-gil mein hai

jam hai mina hai sahba-e-junun-afza bhi hai

saqiya aa ja ki ek teri kami mahfil mein hai

be-rah-o-be-rahnuma garm-e-safar hai qafila

faeda kya is tarah ki sai-e-la-hasil mein hai

paikar-e-shauq-o-talab ban kar jo hai garm-e-safar

har qadam us rah-rau ka sarhad-e-manzil mein hai

marja-e-ilham ban sakta hai koshish ho agar

ek maqam aisa bhi pinhan aadmi ke dil mein hai

aaftab-e-dil se garma aur chamka de use

zarra-e-haq jo nihan gard-e-rah-e-baatil mein hai

dil to hai na-ashna-e-baada-ha-e-zindagi

jam-o-mina ka magar sauda sar-e-ghafil mein hai

DhunDte rahiye magar 'amjad' ko pa sakte nahin

wo to ab ek nur ke dariya-e-be-sahil mein he