naghma ke soz se ayan dil ka gudaz ho gaya

naġhma ke soz se ayaañ dil kā gudāz ho gayā

laakh chhupāyā jazb-e-ishq faash ye raaz ho gayā

bazm meñ mushtahar huī merī hadīs-e-ārzū

shola-e-jāñ bhaḌak uThā naġhma-e-sāz ho gayā

faash na kar sakā koī raaz tire vajūd kā

faash mujhe jo kar diyā faash ye raaz ho gayā

banda-e-be-navā baḌhe jinn-o-malak se thā ajab

lutf-e-karīm kā magar zarra-navāz ho gayā

mere gunāhoñ se sivā rahmateñ haiñ tirī karīm

laakh ḳhatāoñ par bhī tū banda-navāz ho gayā

farhat-e-bandagī milī tābish-e-zindagī milī

dil se jo ek baar maiñ mahv-e-namāz ho gayā

'tāj' niyāz-e-āshiqī rāz-e-numūd-e-husn hai

jis pe ye raaz khul gayā ḳhud hī vo raaz ho gayā

naghma ke soz se ayan dil ka gudaz ho gaya

lakh chhupaya jazb-e-ishq fash ye raaz ho gaya

bazm mein mushtahar hui meri hadis-e-arzu

shola-e-jaan bhaDak uTha naghma-e-saz ho gaya

fash na kar saka koi raaz tere wajud ka

fash mujhe jo kar diya fash ye raaz ho gaya

banda-e-be-nawa baDhe jinn-o-malak se tha ajab

lutf-e-karim ka magar zarra-nawaz ho gaya

mere gunahon se siwa rahmaten hain teri karim

lakh KHataon par bhi tu banda-nawaz ho gaya

farhat-e-bandagi mili tabish-e-zindagi mili

dil se jo ek bar main mahw-e-namaz ho gaya

'taj' niyaz-e-ashiqi raaz-e-numud-e-husn hai

jis pe ye raaz khul gaya KHud hi wo raaz ho gaya