naghma-o-ishq se hain subha-o-zunnar mile

naġhma-o-ishq se haiñ sub.ha-o-zunnār mile

ek āvāz pe do saaz ke haiñ taar mile

maiñ to āshufta-e-dil aur dil āshufta-e-zulf

ḳhuub ham donoñ giraftār giraftār mile

maslahat hai ki tirī chashm ko hai dil se hijāb

ranj ho aur jo bīmār se bīmār mile

din tavaqqo' hī tavaqqo' meñ kahāñ tak guzreñ

mar ga.e hijr meñ bas ab to kahīñ yaar mile

apnī hī vaz' pe lāveñge ḳhudā ḳhair kare

be-tarah rahte haiñ is shoḳh se ayyār mile

dard-o-ranj-o-alam o hasrat-o-dāġh o ġham-o-rashk

mujh ko kyā kyā na tire 'ishq meñ āzār mile

kyā baḌī 'umr hai dil meñ abhī guzrā thā mire

ki mazā hove jo aise meñ vo dildār mile

baare to aan hī pahuñchā mirā jī shaad huā

maiñ ne ab jaanā ki haiñ donoñ ke asrār mile

muuñd le jab tū in āñkhoñ ko jahāñ se tū 'hasan'

dil kī āñkhoñ se tujhe yaar kā dīdār mile

naghma-o-ishq se hain subha-o-zunnar mile

ek aawaz pe do saz ke hain tar mile

main to aashufta-e-dil aur dil aashufta-e-zulf

KHub hum donon giraftar giraftar mile

maslahat hai ki teri chashm ko hai dil se hijab

ranj ho aur jo bimar se bimar mile

din tawaqqo' hi tawaqqo' mein kahan tak guzren

mar gae hijr mein bas ab to kahin yar mile

apni hi waz' pe lawenge KHuda KHair kare

be-tarah rahte hain is shoKH se ayyar mile

dard-o-ranj-o-alam o hasrat-o-dagh o gham-o-rashk

mujh ko kya kya na tere 'ishq mein aazar mile

kya baDi 'umr hai dil mein abhi guzra tha mere

ki maza howe jo aise mein wo dildar mile

bare to aan hi pahuncha mera ji shad hua

main ne ab jaana ki hain donon ke asrar mile

mund le jab tu in aankhon ko jahan se tu 'hasan'

dil ki aankhon se tujhe yar ka didar mile