nahin dekhta din jise chashm-e-shab dekhti hai

nahīñ dekhtā din jise chashm-e-shab dekhtī hai

añdherā bhī ik dūsre rañg kī raushnī hai

purāne añdheroñ ko āñkhoñ meñ mahfūz rakhnā

na.ī raushnī kuchh yaqīnī nahīñ raushnī hai

chalī jaa.e bāzār meñ raushnī jab achānak

chamakne lage jo bas ik dam vahī aadmī hai

chimaT jaa.e jo jism se maut se lamha pahle

jise roknā ġhair-mumkin ho vo zindagī hai

usī kī badaulat to ghar apnā ghar lag rahā hai

jo chīzoñ kī bhar-mār meñ ik zarā sī kamī hai

phaTe-hāl aisā yahāñ koī aur ab kahāñ hai

zarā ġhaur se dekhnā farhat-ehsās hī hai

nahin dekhta din jise chashm-e-shab dekhti hai

andhera bhi ek dusre rang ki raushni hai

purane andheron ko aankhon mein mahfuz rakhna

nai raushni kuchh yaqini nahin raushni hai

chali jae bazar mein raushni jab achanak

chamakne lage jo bas ek dam wahi aadmi hai

chimaT jae jo jism se maut se lamha pahle

jise rokna ghair-mumkin ho wo zindagi hai

usi ki badaulat to ghar apna ghar lag raha hai

jo chizon ki bhar-mar mein ek zara si kami hai

phaTe-haal aisa yahan koi aur ab kahan hai

zara ghaur se dekhna farhat-ehsas hi hai