nahin hai amn ka duniya mein ab maqam koi

nahīñ hai amn kā duniyā meñ ab maqām koī

ḳhudā ḳhudā kahe koī ki raam raam koī

mire banā.e to bantā nahīñ hai kaam koī

vo kārsāz kare us kā intizām koī

na hogā bazm kā bātoñ se intizām koī

ḳhud apnī baat pe tujh ko nahīñ qayām koī

tumhāre ho ke jo ham zillateñ uThāte haiñ

zalīl hogā kisī kā na yuuñ ġhulām koī

uThāo teġh sazā do raqīb-e-mufsid ko

nasīhatoñ se huā hai kab intizām koī

chhurī se rahm kare pahle kis par ab sayyād

koī qafas meñ taḌaptā hai zer-e-dām koī

ye mujh se aañkh milātā nahīñ hai kyuuñ saaqī

mire nasīb kā shāyad nahīñ hai jaam koī

jo naam lete haiñ terā vo qatl hote haiñ

nahīñ maregā jo legā na terā naam koī

kuchh aur kījiye tadbīr kaam kī 'rāġhib'

ki haa.e haa.e se bantā nahīñ hai kaam koī

nahin hai amn ka duniya mein ab maqam koi

KHuda KHuda kahe koi ki ram ram koi

mere banae to banta nahin hai kaam koi

wo karsaz kare us ka intizam koi

na hoga bazm ka baaton se intizam koi

KHud apni baat pe tujh ko nahin qayam koi

tumhaare ho ke jo hum zillaten uThate hain

zalil hoga kisi ka na yun ghulam koi

uThao tegh saza do raqib-e-mufsid ko

nasihaton se hua hai kab intizam koi

chhuri se rahm kare pahle kis par ab sayyaad

koi qafas mein taDapta hai zer-e-dam koi

ye mujh se aankh milata nahin hai kyun saqi

mere nasib ka shayad nahin hai jam koi

jo nam lete hain tera wo qatl hote hain

nahin marega jo lega na tera nam koi

kuchh aur kijiye tadbir kaam ki 'raghib'

ki hae hae se banta nahin hai kaam koi