nahin hai naseh-e-nadan sharab shishe mein

nahīñ hai nāseh-e-nādāñ sharāb shīshe meñ

bharā hai rind ne aish-e-shabāb shīshe meñ

vo rind huuñ ki sū-e-mai-kada agar jā.ūñ

to mauj-e-bād ho mauj-e-sharāb shīshe meñ

jo aks-e-sāqī-e-rangīñ-adā ho aks-fagan

to mauj-e-mai ko rahe pech-o-tāb shīshe meñ

hai aks-e-chīn-e-jabīñ mauj-e-bāda-e-gulgūñ

janāb haiñ tirī chashm-e-itāb shīshe meñ

rahe jo taak meñ bint-ul-inab ke zāhid-e-ḳhushk

to jin kī tarah rahe band ḳhvāb shīshe meñ

habāb-e-mai ke liye ehtiyāj-e-mauj kahāñ

ye ḳhema nasb huā be-tanāb shīshe meñ

gulābiyāñ raheñ ḳhālī bahār meñ saaqī

tire karam kā na barsā sahāb shīshe meñ

kahāñ haiñ aḳhtar-e-tābāñ falak pe zarre haiñ

bharī hai ḳhāk-e-dar-e-bū-turāb shīshe meñ

ḳhayāl-e-ruḳh ho jo hangām-e-dūd-ashāmī

har ek zarra bane āftāb shīshe meñ

halāl kyoñ nahīñ mai ham pe hazrat-e-zāhid

ye ḳhūn-e-tauba nahīñ ai janāb shīshe meñ

nahin hai naseh-e-nadan sharab shishe mein

bhara hai rind ne aish-e-shabab shishe mein

wo rind hun ki su-e-mai-kada agar jaun

to mauj-e-baad ho mauj-e-sharab shishe mein

jo aks-e-saqi-e-rangin-ada ho aks-fagan

to mauj-e-mai ko rahe pech-o-tab shishe mein

hai aks-e-chin-e-jabin mauj-e-baada-e-gulgun

janab hain teri chashm-e-itab shishe mein

rahe jo tak mein bint-ul-inab ke zahid-e-KHushk

to jin ki tarah rahe band KHwab shishe mein

habab-e-mai ke liye ehtiyaj-e-mauj kahan

ye KHema nasb hua be-tanab shishe mein

gulabiyan rahen KHali bahaar mein saqi

tere karam ka na barsa sahab shishe mein

kahan hain aKHtar-e-taban falak pe zarre hain

bhari hai KHak-e-dar-e-bu-turab shishe mein

KHayal-e-ruKH ho jo hangam-e-dud-ashami

har ek zarra bane aaftab shishe mein

halal kyon nahin mai hum pe hazrat-e-zahid

ye KHun-e-tauba nahin ai janab shishe mein