nahin ho paegi tujh par ayan aazurdagi dil ki

nahīñ ho pā.egī tujh par ayaañ āzurdagī dil kī

chhupā rakkhī nihāñ-ḳhānoñ meñ hai afsurdagī dil kī

thakan chehroñ pe hai aur raunaqeñ nāpaid duniyā kī

añdheroñ meñ na jaane kab se hai tābindagī dil kī

koī nabzeñ TaTole saañs kī bhī āhaTeñ parkhe

milegā khoj na koī hai kyā darmāndagī dil kī

zamāna apnī chāleñ chal gayā hai ham yahīñ par haiñ

na apne saath ab tak ho sakī āmādgī dil kī

sarāboñ meñ qadam haiñ to uḌāneñ haiñ ḳhayāloñ meñ

na.e rastoñ pe le aa.ī hai ye uftādgī dil kī

fatāvā-e-jahāñ-gīrī ravish kaise badal paa.eñ

jo ḳhud ke bhī na bas meñ ho sake āshuftagī dil kī

jafā badle vafā ke aur mohabbat kī jazā nafrat

miTegī kyā kisī taujīh se sharmindagī dil kī

gul-e-ummīd khilne ko chaman meñ ābiyārī ho

ḳhizāñ kā ruup na dhāre kahīñ pazhmurdagī dil kī

hameñ ik ālam-e-taskīn meñ rahnā mayassar ho

'sabīñ' sharf-e-qubūliyyat jo paa.e bandagī dil kī

nahin ho paegi tujh par ayan aazurdagi dil ki

chhupa rakkhi nihan-KHanon mein hai afsurdagi dil ki

thakan chehron pe hai aur raunaqen napaid duniya ki

andheron mein na jaane kab se hai tabindagi dil ki

koi nabzen TaTole sans ki bhi aahaTen parkhe

milega khoj na koi hai kya darmandagi dil ki

zamana apni chaalen chal gaya hai hum yahin par hain

na apne sath ab tak ho saki aamadgi dil ki

sarabon mein qadam hain to uDanen hain KHayalon mein

nae raston pe le aai hai ye uftadgi dil ki

fatawa-e-jahan-giri rawish kaise badal paen

jo KHud ke bhi na bas mein ho sake aashuftagi dil ki

jafa badle wafa ke aur mohabbat ki jaza nafrat

miTegi kya kisi taujih se sharmindagi dil ki

gul-e-ummid khilne ko chaman mein aabiyari ho

KHizan ka rup na dhaare kahin pazhmurdagi dil ki

hamein ek aalam-e-taskin mein rahna mayassar ho

'sabin' sharf-e-qubuliyyat jo pae bandagi dil ki