nahin ho tum to har shai ajnabi malum hoti hai

nahīñ ho tum to har shai ajnabī ma.alūm hotī hai

bahār-e-zindagī kāñToñ bharī ma.alūm hotī hai

charāġh-e-zīst kī lau thartharātī hai chale aao

mujhe har saañs apnī āḳhirī ma.alūm hotī hai

batā.ūñ kyā tumhārī chashm-e-ulfat kī asar-rezī

rag-o-pai meñ utartī barq sī ma.alūm hotī hai

sitam mujh par usī andāz se paiham kiye jaao

tumhārī dushmanī bhī dostī ma.alūm hotī hai

jahāñ dekhā kisī ne bhī hameñ chashm-e-mohabbat se

palaT kar zindagī aa.ī huī ma.alūm hotī hai

tavāf-e-dair-o-ka.aba se yahī hāsil huā mujh ko

mohabbat hī sarāpā bandagī ma.alūm hotī hai

'jalīl' ik sham-e-hasrat bujh ga.ī to ġham nahīñ is kā

abhī dāġh-e-jigar meñ raushnī ma.alūm hotī hai

nahin ho tum to har shai ajnabi malum hoti hai

bahaar-e-zindagi kanTon bhari malum hoti hai

charagh-e-zist ki lau thartharaati hai chale aao

mujhe har sans apni aaKHiri malum hoti hai

bataun kya tumhaari chashm-e-ulfat ki asar-rezi

rag-o-pai mein utarti barq si malum hoti hai

sitam mujh par usi andaz se paiham kiye jao

tumhaari dushmani bhi dosti malum hoti hai

jahan dekha kisi ne bhi hamein chashm-e-mohabbat se

palaT kar zindagi aai hui malum hoti hai

tawaf-e-dair-o-kaba se yahi hasil hua mujh ko

mohabbat hi sarapa bandagi malum hoti hai

'jalil' ek sham-e-hasrat bujh gai to gham nahin is ka

abhi dagh-e-jigar mein raushni malum hoti hai