nahin manzur tap-e-hijr ka ruswa hona

nahīñ manzūr tap-e-hijr kā rusvā honā

tere bīmār kā achchhā nahīñ achchhā honā

nāsehā vus.at-e-kāshāna junūñ-ḳhez nahīñ

varna kyā farz hai āvāra-e-sahrā honā

bas ab ai zabt ziyāda mujhe mahjūb na kar

hai mirī aañkh kī taqdīr meñ dariyā honā

kis se khulte haiñ tirī zulf-e-girah-gīr ke bal

koī āsān hai ye uqda-e-dil vā honā

nigah-e-nāz ko āsāñ dam-e-ḳhanjar banñā

lab-e-jāñ-baḳhsh ko dushvār masīhā honā

haa.e bātoñ meñ tirī laġhzish-e-mastāna-e-nāz

haa.e āñkhoñ meñ tirī nashsha-e-sahbā honā

hama-tan dāġh-e-ġham-e-ishq-e-butāñ huuñ 'fānī'

dil se bhātā hai mujhe naqsh-e-suvaidā honā

nahin manzur tap-e-hijr ka ruswa hona

tere bimar ka achchha nahin achchha hona

naseha wusat-e-kashana junun-KHez nahin

warna kya farz hai aawara-e-sahra hona

bas ab ai zabt ziyaada mujhe mahjub na kar

hai meri aankh ki taqdir mein dariya hona

kis se khulte hain teri zulf-e-girah-gir ke bal

koi aasan hai ye uqda-e-dil wa hona

nigah-e-naz ko aasan dam-e-KHanjar banna

lab-e-jaan-baKHsh ko dushwar masiha hona

hae baaton mein teri laghzish-e-mastana-e-naz

hae aankhon mein teri nashsha-e-sahba hona

hama-tan dagh-e-gham-e-ishq-e-butan hun 'fani'

dil se bhata hai mujhe naqsh-e-suwaida hona