nai hawaon ke hamrah chal raha hun main

na.ī havāoñ ke hamrāh chal rahā huuñ maiñ

badal rahā hai zamāna badal rahā huuñ maiñ

ye kaisī aag hai us ke badan se uThtī huī

ki us ko dekh rahā huuñ to jal rahā huuñ maiñ

unheñ ye fikr nahīñ hai ki bujh rahe haiñ vo

unheñ to ḳhauf hai is kā ki jal rahā huuñ maiñ

mire 'urūj kī jis ne du'ā.eñ māñgī thiiñ

ḳhabar karo zarā us ko ki Dhal rahā huuñ maiñ

jo mere naam se hotā hai ab shikan-ālūd

ka.ī baras usī māthe kā bal rahā huuñ maiñ

na manziloñ kā pata hai na rāstoñ kā surāġh

bas ik talāsh hai terī so chal rahā huuñ maiñ

azal se 'nūr' hai mujh ko sukūn-e-dil kī talāsh

aur is talāsh meñ bas ghar badal rahā huuñ maiñ

nai hawaon ke hamrah chal raha hun main

badal raha hai zamana badal raha hun main

ye kaisi aag hai us ke badan se uThti hui

ki us ko dekh raha hun to jal raha hun main

unhen ye fikr nahin hai ki bujh rahe hain wo

unhen to KHauf hai is ka ki jal raha hun main

mere 'uruj ki jis ne du'aen mangi thin

KHabar karo zara us ko ki Dhal raha hun main

jo mere nam se hota hai ab shikan-alud

kai baras usi mathe ka bal raha hun main

na manzilon ka pata hai na raston ka suragh

bas ek talash hai teri so chal raha hun main

azal se 'nur' hai mujh ko sukun-e-dil ki talash

aur is talash mein bas ghar badal raha hun main