nai nai aankhen hon to har manzar achchha lagta hai

na.ī na.ī āñkheñ hoñ to har manzar achchhā lagtā hai

kuchh din shahr meñ ghūme lekin ab ghar achchhā lagtā hai

milne-julne vāloñ meñ to sab hī apne jaise haiñ

jis se ab tak mile nahīñ vo aksar achchhā lagtā hai

mere āñgan meñ aa.e yā tere sar par choT lage

sannāToñ meñ bolne vaalā patthar achchhā lagtā hai

chāhat ho yā puujā sab ke apne apne sāñche haiñ

jo maut meñ Dhal jaa.e vo paikar achchhā lagtā hai

ham ne bhī so kar dekhā hai na.e purāne shahroñ meñ

jaisā bhī hai apne ghar kā bistar achchhā lagtā hai

nai nai aankhen hon to har manzar achchha lagta hai

kuchh din shahr mein ghume lekin ab ghar achchha lagta hai

milne-julne walon mein to sab hi apne jaise hain

jis se ab tak mile nahin wo aksar achchha lagta hai

mere aangan mein aae ya tere sar par choT lage

sannaTon mein bolne wala patthar achchha lagta hai

chahat ho ya puja sab ke apne apne sanche hain

jo maut mein Dhal jae wo paikar achchha lagta hai

hum ne bhi so kar dekha hai nae purane shahron mein

jaisa bhi hai apne ghar ka bistar achchha lagta hai