nai ruton ki yahan se nishaniyan le ja

na.ī rutoñ kī yahāñ se nishāniyāñ le jā

khile nahīñ haiñ abhī phuul pattiyāñ le jā

ye dukh ye ranj ye āzurda-hāliyāñ le jā

tū shahr-e-dil kī mire sab udāsiyāñ le jā

añdherī raat bahut duur hai tirī manzil

safar meñ saath ujāloñ kī kirchiyāñ le jā

yaqīn us ko tirī baat par na jab aa.e

lahū se maiñ ne jo likkhī haiñ chiTThiyāñ le jā

sunā chukā huuñ mohabbat kī dāstāñ tujh ko

tū mere dil meñ jo haiñ bad-gumāniyāñ le jā

tire nagar meñ agar hai bahār kā mausam

zarūr shahr se mere tū titliyāñ le jā

ḳhushī kī baat koī kis tarah kahe 'anvar'

lahūluhān diloñ kī kahāniyāñ le jā

nai ruton ki yahan se nishaniyan le ja

khile nahin hain abhi phul pattiyan le ja

ye dukh ye ranj ye aazurda-haaliyan le ja

tu shahr-e-dil ki mere sab udasiyan le ja

andheri raat bahut dur hai teri manzil

safar mein sath ujalon ki kirchiyan le ja

yaqin us ko teri baat par na jab aae

lahu se main ne jo likkhi hain chiTThiyan le ja

suna chuka hun mohabbat ki dastan tujh ko

tu mere dil mein jo hain bad-gumaniyan le ja

tere nagar mein agar hai bahaar ka mausam

zarur shahr se mere tu titliyan le ja

KHushi ki baat koi kis tarah kahe 'anwar'

lahuluhan dilon ki kahaniyan le ja