nai zamin nai mamlikat dikhaiyega

na.ī zamīn na.ī mamlikat dikhā.iyegā

falak kā farsh nahīñ ham ko chhat dikhā.iyegā

kabhī jo dekhne aa.e havā-e-mustaqbil

use ye baaġh mirī ma.arifat dikhā.iyegā

zar-e-ḳhayāl ko zam kar ke apne she'roñ meñ

koī kamāl parat-dar-parat dikhā.iyegā

jo lafz-e-ishq pe jiz-biz huā thā maktab meñ

use biThā ke kisī din luġhat dikhā.iyegā

dikhā.iyegā fasāhat ke mo'jize sab ko

ik ek nukte meñ sau-sau jihat dikhā.iyegā

bharā huā huuñ bahut intiqām se 'āzar'

maiñ noch lūñgā mujhe āñkheñ mat dikhā.iyegā

nai zamin nai mamlikat dikhaiyega

falak ka farsh nahin hum ko chhat dikhaiyega

kabhi jo dekhne aae hawa-e-mustaqbil

use ye bagh meri marifat dikhaiyega

zar-e-KHayal ko zam kar ke apne she'ron mein

koi kamal parat-dar-parat dikhaiyega

jo lafz-e-ishq pe jiz-biz hua tha maktab mein

use biTha ke kisi din lughat dikhaiyega

dikhaiyega fasahat ke mo'jize sab ko

ek ek nukte mein sau-sau jihat dikhaiyega

bhara hua hun bahut intiqam se 'azar'

main noch lunga mujhe aankhen mat dikhaiyega