nairangī-e-vahshat kī dhanak dekh rahe haiñ
TuuTe hue taare kī chamak dekh rahe haiñ
is ā.ina-ḳhāna-numā aalam se nikal kar
kuchh log pas-e-bām-e-falak dekh rahe haiñ
dil-galiyoñ meñ baiThe hue ḳhvābīda musāfir
is shahr-e-tamannā kī saḌak dekh rahe haiñ
ginvā.eñge buniyād kī kamiyāñ bhī abhī ham
dīvāroñ pe manqūsh darak dekh rahe haiñ
ik buud ko phir hast banāne pe tulā hai
hairat se ham is dil kī sanak dekh rahe haiñ
duniyā ne jise qabr kahā hai ham usī meñ
ik husn-e-mujassam kī jhalak dekh rahe haiñ
ham gosh-bar-āvāz-e-adam log haiñ 'jānī'
āvāz-e-ḳhamoshī kī khanak dekh rahe haiñ
nairangi-e-wahshat ki dhanak dekh rahe hain
TuTe hue tare ki chamak dekh rahe hain
is aaina-KHana-numa aalam se nikal kar
kuchh log pas-e-baam-e-falak dekh rahe hain
dil-galiyon mein baiThe hue KHwabida musafir
is shahr-e-tamanna ki saDak dekh rahe hain
ginwaenge buniyaad ki kamiyan bhi abhi hum
diwaron pe manqush darak dekh rahe hain
ek bud ko phir hast banane pe tula hai
hairat se hum is dil ki sanak dekh rahe hain
duniya ne jise qabr kaha hai hum usi mein
ek husn-e-mujassam ki jhalak dekh rahe hain
hum gosh-bar-awaz-e-adam log hain 'jaani'
aawaz-e-KHamoshi ki khanak dekh rahe hain
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
