nam-dida hain masum si kashmir ki aankhen

nam-dīda haiñ ma.asūm sī kashmīr kī āñkheñ

hasrat se unheñ taktī haiñ tadbīr kī āñkheñ

zindāñ ke ġham-o-dard kā ehsās hai un ko

atrāf mire lipTī haiñ zanjīr kī āñkheñ

mil jaatī unheñ quvvat-e-goyā.ī to kyā thā

kuchh kahne se ma.azūr haiñ tasvīr kī āñkheñ

tadbīr ke maidān meñ nākāmī se terī

māyūs huī jaatī haiñ taqdīr kī āñkheñ

logoñ kī nigāhoñ se to mahfūz hai lekin

vāqif haiñ tire zulm se shahtīr kī āñkheñ

dekhā hī nahīñ us kī basārat ko kisī ne

kartī haiñ shikāyat mirī tahrīr kī āñkheñ

āñkhoñ meñ nazar Daal ke āñkheñ use dekho

din raat ġhazab Dhātī haiñ shamshīr kī āñkheñ

nam-dida hain masum si kashmir ki aankhen

hasrat se unhen takti hain tadbir ki aankhen

zindan ke gham-o-dard ka ehsas hai un ko

atraf mere lipTi hain zanjir ki aankhen

mil jati unhen quwwat-e-goyai to kya tha

kuchh kahne se mazur hain taswir ki aankhen

tadbir ke maidan mein nakaami se teri

mayus hui jati hain taqdir ki aankhen

logon ki nigahon se to mahfuz hai lekin

waqif hain tere zulm se shahtir ki aankhen

dekha hi nahin us ki basarat ko kisi ne

karti hain shikayat meri tahrir ki aankhen

aankhon mein nazar Dal ke aankhen use dekho

din raat ghazab Dhati hain shamshir ki aankhen