namak nigahon mein honTon mein zaiqa na raha

namak nigāhoñ meñ hoñToñ meñ zā.iqa na rahā

unheñ rijhāne kā ab ham meñ hausla na rahā

na taak jhāñk na hī chilmaneñ darīchoñ par

jahāñ bhī dekhiye nazroñ kā rābta na rahā

piro ke haar rahī jis kī muntazir barsoñ

vo lamha bhar bhī mire sāmne khaḌā na rahā

ajab zamāna hai bantī haiñ joḌiyāñ pal-pal

rahī pasand svayamvar kā marhala na rahā

kisī ke marne kā ġham ab kisī ke dil meñ nahīñ

mohabbatoñ kā kisī dil meñ bhī sila na rahā

aur is ke ba.ad hī maiñ jiit kī kagār pe thā

aur is ke ba.ad hī un se muqābla na rahā

ḳhudā-e-vaqt banā jab se pahre-dār apnā

ḳhudā kā shukr tahaffuz kā silsila na rahā

unheñ ye dukh ki ulaT dī hai maiñ ne hī baazī

mujhe ye ġham ki mire haath meñ diyā na rahā

kahāñ se aa.e haiñ 'īraj' ye but-tarāsh yahāñ

ki shahr-e-dil kā bhī mahfūz ā.īna na rahā

namak nigahon mein honTon mein zaiqa na raha

unhen rijhane ka ab hum mein hausla na raha

na tak jhank na hi chilmanen darichon par

jahan bhi dekhiye nazron ka rabta na raha

piro ke haar rahi jis ki muntazir barson

wo lamha bhar bhi mere samne khaDa na raha

ajab zamana hai banti hain joDiyan pal-pal

rahi pasand swayamwar ka marhala na raha

kisi ke marne ka gham ab kisi ke dil mein nahin

mohabbaton ka kisi dil mein bhi sila na raha

aur is ke baad hi main jit ki kagar pe tha

aur is ke baad hi un se muqabla na raha

KHuda-e-waqt bana jab se pahre-dar apna

KHuda ka shukr tahaffuz ka silsila na raha

unhen ye dukh ki ulaT di hai main ne hi bazi

mujhe ye gham ki mere hath mein diya na raha

kahan se aae hain 'iraj' ye but-tarash yahan

ki shahr-e-dil ka bhi mahfuz aaina na raha