naqab-e-bazm-e-tasawwur uThai jati hai

naqāb-e-bazm-e-tasavvur uThā.ī jaatī hai

shikast-ḳhurdoñ kī himmat baḌhā.ī jaatī hai

bhaTakne lagtā hai rāh-e-vafā se jab aalam

hadīs-e-ishq hamārī sunā.ī jaatī hai

matā-e-hosh-o-ḳhirad be-bahā sahī lekin

dar-e-habīb pe ye bhī luTā.ī jaatī hai

nazar se hotī hai lutf-o-karam kī bārish bhī

nazar se barq-e-tapāñ bhī girā.ī jaatī hai

vufūr-e-shauq kī dekho to maslahat-koshī

junūñ kī baat ḳhirad se chhupā.ī jaatī hai

kis e'timād se āġhāz-e-daur-e-ulfat meñ

ḳhayāl-o-ḳhvāb kī duniyā basā.ī jaatī hai

fazā-e-rūh pe tārīkiyāñ musallat haiñ

haram meñ sham-e-aqīdat jalā.ī jaatī hai

dikhā dikhā ke ma.āl-e-junūñ kī fitnagarī

bashar ko rasm-e-muravvat sikhā.ī jaatī hai

matā-e-ishq-o-mohabbat nigāh-e-ālam se

kis ehtiyāt se 'fāriġh' chhupā.ī jaatī hai

naqab-e-bazm-e-tasawwur uThai jati hai

shikast-KHurdon ki himmat baDhai jati hai

bhaTakne lagta hai rah-e-wafa se jab aalam

hadis-e-ishq hamari sunai jati hai

mata-e-hosh-o-KHirad be-baha sahi lekin

dar-e-habib pe ye bhi luTai jati hai

nazar se hoti hai lutf-o-karam ki barish bhi

nazar se barq-e-tapan bhi girai jati hai

wufur-e-shauq ki dekho to maslahat-koshi

junun ki baat KHirad se chhupai jati hai

kis e'timad se aaghaz-e-daur-e-ulfat mein

KHayal-o-KHwab ki duniya basai jati hai

faza-e-ruh pe tarikiyan musallat hain

haram mein sham-e-aqidat jalai jati hai

dikha dikha ke maal-e-junun ki fitnagari

bashar ko rasm-e-murawwat sikhai jati hai

mata-e-ishq-o-mohabbat nigah-e-alam se

kis ehtiyat se 'farigh' chhupai jati hai