naqab-e-shab mein chhup kar kis ki yaad aai samajhte hain

naqāb-e-shab meñ chhup kar kis kī yaad aa.ī samajhte haiñ

ishāre ham tire ai sham-e-tanhā.ī samajhte haiñ

na samjheñ baat vaa.iz kī ham itne bhī nahīñ nādāñ

kahāñ tak hai bisāt-e-aql-o-dānā.ī samajhte haiñ

tavajjoh phir tavajjoh hai magar ham tere dīvāne

taġhāful ko bhī ik andāz-e-rānān.ī samajhte haiñ

hameñ nā-āshnā samjho na rasm-o-rāh-e-manzil se

kahāñ le jā rahā hai zauq-e-rusvā.ī samajhte haiñ

ham aise sar-phiroñ ko kaam kyā hai marg o hastī se

ye sab hai shoḳhi-e-nāz-e-masīhā.ī samajhte haiñ

ham ai ḳhalvat-nashīñ āḳhir meñ tere dekhne vaale

ye kyuuñ hai ehtimām-e-mahfil-ārā.ī samajhte haiñ

ridā-e-pākī-o-taqvā kī azmat meñ to kyā shak hai

'ravish' ham to ġhubār-e-kū-e-rusvā.ī samajhte haiñ

naqab-e-shab mein chhup kar kis ki yaad aai samajhte hain

ishaare hum tere ai sham-e-tanhai samajhte hain

na samjhen baat waiz ki hum itne bhi nahin nadan

kahan tak hai bisat-e-aql-o-danai samajhte hain

tawajjoh phir tawajjoh hai magar hum tere diwane

taghaful ko bhi ek andaz-e-ranani samajhte hain

hamein na-ashna samjho na rasm-o-rah-e-manzil se

kahan le ja raha hai zauq-e-ruswai samajhte hain

hum aise sar-phiron ko kaam kya hai marg o hasti se

ye sab hai shoKHi-e-naz-e-masihai samajhte hain

hum ai KHalwat-nashin aaKHir mein tere dekhne wale

ye kyun hai ehtimam-e-mahfil-arai samajhte hain

rida-e-paki-o-taqwa ki azmat mein to kya shak hai

'rawish' hum to ghubar-e-ku-e-ruswai samajhte hain