naqsh-bar-ab nam hai sail-e-fana maqam

naqsh-bar-āb naam hai sail-e-fanā maqām

is ḳhānumāñ-ḳharāb kā kyā naam kyā maqām

har roz taaza manzil o har shab nayā maqām

mohlat nahīñ qayām kī duniyā hai kyā maqām

jā mil ga.ī jise tirī dīvār ke tale

hai us ko gor-e-tañg bhī ik dil-kushā maqām

Darte haiñ ham to naam bhī lete hue tirā

tū hī batā ki pūchhiye kyūñkar tirā maqām

insān kī sarisht meñ hai uzr-e-lañg-e-zo.af

sābit huā ki duur hai mujh se mirā maqām

andāza hī ġhalat thā magar imtiyāz kā

ya.anī mahall-e-ġhair hī thā aap kā maqām

khiltā nahīñ kabhī na kabhī saaf hī rahe

kis tarah ho subūt ki dil hai tirā maqām

vaa.iz munāza.at kā sabab mujh meñ tujh meñ kyā

masjid tirā mahal hai mirā mai-kada maqām

yaañ vaañ idhar udhar yuuñ hī gir-paḌ ke kī basar

misl-e-ġhubār-e-rāh rahā jā-ba-jā maqām

ai ahl-e-dair zikr-e-haram tum se yā kareñ

pūchho butoñ hī se kabhī ka.aba bhī thā maqām

kyā kyā bayāñ jahāñ ke kareñ amn-o-chain ko

us ke bhī dar pe apnā to muddat rahā maqām

kyā jāniye 'qalaq' ki irāda hai apnā kyā

matlab se kuchh safar na sar-e-mudda.ā maqām

naqsh-bar-ab nam hai sail-e-fana maqam

is KHanuman-KHarab ka kya nam kya maqam

har roz taza manzil o har shab naya maqam

mohlat nahin qayam ki duniya hai kya maqam

ja mil gai jise teri diwar ke tale

hai us ko gor-e-tang bhi ek dil-kusha maqam

Darte hain hum to nam bhi lete hue tera

tu hi bata ki puchhiye kyunkar tera maqam

insan ki sarisht mein hai uzr-e-lang-e-zoaf

sabit hua ki dur hai mujh se mera maqam

andaza hi ghalat tha magar imtiyaz ka

yani mahall-e-ghair hi tha aap ka maqam

khilta nahin kabhi na kabhi saf hi rahe

kis tarah ho subut ki dil hai tera maqam

waiz munazat ka sabab mujh mein tujh mein kya

masjid tera mahal hai mera mai-kada maqam

yan wan idhar udhar yun hi gir-paD ke ki basar

misl-e-ghubar-e-rah raha ja-ba-ja maqam

ai ahl-e-dair zikr-e-haram tum se ya karen

puchho buton hi se kabhi kaba bhi tha maqam

kya kya bayan jahan ke karen amn-o-chain ko

us ke bhi dar pe apna to muddat raha maqam

kya jaaniye 'qalaq' ki irada hai apna kya

matlab se kuchh safar na sar-e-muddaa maqam