naqsh daur-e-mazi ke zehn mein ubharte hain

naqsh daur-e-māzī ke zehn meñ ubharte haiñ

bhūlī-bisrī rāhoñ se jab kabhī guzarte haiñ

añg añg hañstā hai zāviye nikharte haiñ

jab vo muskurāte haiñ jab vo baat karte haiñ

ham unhīñ pe jān-o-dil bhī nisār karte haiñ

apnā hāl-e-dil jin se arz karte Darte haiñ

is qadar na hotā zaañ aarzī bulandī par

uḌne vaale taa.ir ke bāl-o-par katarte haiñ

nashsha-e-javānī meñ uḌte haiñ havāoñ par

āsmān se nīche kab vo paañv dharte haiñ

mehr-o-mah kī gardish meñ DhūñDhte haiñ qismat ko

apnī apnī kartī par kam nigāh karte haiñ

jaur-o-jabr kā un kā silsila nahīñ TuuTā

go vafāoñ ke ham ne sab usuul barte haiñ

kuchh sukūn detī haiñ badliyāñ umīdoñ kī

yās-o-huzn ke tūfāñ sar se jab guzarte haiñ

'mauj' bahr-e-ulfat meñ lāzmī haiñ ġhavvāsī

ġharq hone vaale hī paar bhī utarte haiñ

naqsh daur-e-mazi ke zehn mein ubharte hain

bhuli-bisri rahon se jab kabhi guzarte hain

ang ang hansta hai zawiye nikharte hain

jab wo muskuraate hain jab wo baat karte hain

hum unhin pe jaan-o-dil bhi nisar karte hain

apna haal-e-dil jin se arz karte Darte hain

is qadar na hota zan aarzi bulandi par

uDne wale tair ke baal-o-par katarte hain

nashsha-e-jawani mein uDte hain hawaon par

aasman se niche kab wo panw dharte hain

mehr-o-mah ki gardish mein DhunDhte hain qismat ko

apni apni karti par kam nigah karte hain

jaur-o-jabr ka un ka silsila nahin TuTa

go wafaon ke hum ne sab usul barte hain

kuchh sukun deti hain badliyan umidon ki

yas-o-huzn ke tufan sar se jab guzarte hain

'mauj' bahr-e-ulfat mein lazmi hain ghawwasi

gharq hone wale hi par bhi utarte hain