naqsh-e-tilism-e-wahm hai duniya kahen jise

naqsh-e-tilism-e-vahm hai duniyā kaheñ jise

nairangī-e-nazar hai tamāshā kaheñ jise

vo sāmne haiñ aur nahīñ tāqat-e-nigāh

be-pardagī bhī vo hai ki pardā kaheñ jise

sharh-e-haqīqat-e-talab-e-nā-tamām hai

ik daftar-e-shikāyat-e-bejā kaheñ jise

us jalva-gāh-e-nāz kī allah re dilkashī

hairānī-e-nazar hai tamāshā kaheñ jise

mauqūf hai ḳhayāl pe ehsās-e-kā.enāt

hai ik nazāra ḳhvāb kā duniyā kaheñ jise

ā.īna-vār vus.at-e-zauq-e-junūñ kā hai

har zarra merī ḳhaak kā sahrā kaheñ jise

dil hai jabīn-e-shauq ke parde meñ sajda-rez

ik naqsh-e-bandagī hai suvaidā kaheñ jise

shikvoñ meñ rang-e-shoḳhī-e-husn-e-talab rahe

yuuñ ho gilā sitam kā taqāzā kaheñ jise

tārāj-e-shoḳhī-e-nigah-e-nāz ho gayā

vo dil ki dard-e-ishq kī duniyā kaheñ jise

hotā hai juzv kul kī haqīqat kā aa.ina

qatroñ kā ijtimā hai dariyā kaheñ jise

'farruḳh' malāl hī se safā.ī kā lutf hai

ik ḳhaas adā hai ranjish-e-be-jā kaheñ jise

naqsh-e-tilism-e-wahm hai duniya kahen jise

nairangi-e-nazar hai tamasha kahen jise

wo samne hain aur nahin taqat-e-nigah

be-pardagi bhi wo hai ki parda kahen jise

sharh-e-haqiqat-e-talab-e-na-tamam hai

ek daftar-e-shikayat-e-beja kahen jise

us jalwa-gah-e-naz ki allah re dilkashi

hairani-e-nazar hai tamasha kahen jise

mauquf hai KHayal pe ehsas-e-kaenat

hai ek nazara KHwab ka duniya kahen jise

aaina-war wusat-e-zauq-e-junun ka hai

har zarra meri KHak ka sahra kahen jise

dil hai jabin-e-shauq ke parde mein sajda-rez

ek naqsh-e-bandagi hai suwaida kahen jise

shikwon mein rang-e-shoKHi-e-husn-e-talab rahe

yun ho gila sitam ka taqaza kahen jise

taraj-e-shoKHi-e-nigah-e-naz ho gaya

wo dil ki dard-e-ishq ki duniya kahen jise

hota hai juzw kul ki haqiqat ka aaina

qatron ka ijtima hai dariya kahen jise

'farruKH' malal hi se safai ka lutf hai

ek KHas ada hai ranjish-e-be-ja kahen jise