naqsh koi muKHtalif har naqsh ke andar nikal

naqsh koī muḳhtalif har naqsh ke andar nikāl

in purāne manzaroñ meñ se na.e manzar nikāl

aaj kal kaisī havā-e-shahr hai mahsūs kar

ai amīr-e-shahr khiḌkī khol bāhar sar nikāl

apnī jumla 'ādatoñ kī mustaqil tat.hīr kar

roz apne aap meñ se aadmī behtar nikāl

dekhtā rahtā hai kyoñ baiThā parindoñ kī taraf

tū agar parvāz karnā chāhtā hai par nikāl

vo 'ibādat kar ki jo pāband-e-roz-o-shab na ho

chand sajde vaqt kī tahvīl se bāhar nikāl

ek muddat apnī muTThī chashma-e-imkāñ meñ rakh

aur phir is meñ se koī mumkina gauhar nikāl

lauTne yā ruḳh badalne ke to ham qaa.il nahīñ

rāsta roke agar dīvār 'āsim' dar nikāl

naqsh koi muKHtalif har naqsh ke andar nikal

in purane manzaron mein se nae manzar nikal

aaj kal kaisi hawa-e-shahr hai mahsus kar

ai amir-e-shahr khiDki khol bahar sar nikal

apni jumla 'adaton ki mustaqil tathir kar

roz apne aap mein se aadmi behtar nikal

dekhta rahta hai kyon baiTha parindon ki taraf

tu agar parwaz karna chahta hai par nikal

wo 'ibaadat kar ki jo paband-e-roz-o-shab na ho

chand sajde waqt ki tahwil se bahar nikal

ek muddat apni muTThi chashma-e-imkan mein rakh

aur phir is mein se koi mumkina gauhar nikal

lauTne ya ruKH badalne ke to hum qail nahin

rasta roke agar diwar 'asim' dar nikal