narm jhonke se ye ek zaKHm sa kya lagta hai

narm jhoñke se ye ik zaḳhm sā kyā lagtā hai

ai havā kuchh tire dāman meñ chhupā lagtā hai

haT ke dekheñge use raunaq-e-mahfil se kabhī

sabz mausam meñ to har peḌ harā lagtā hai

vo koī aur hai jo pyaas bujhātā hai mirī

abr phailā huā dāmān-e-duā lagtā hai

ai lahū maiñ tujhe maqtal se kahāñ le jā.ūñ

apne manzar hī meñ har rang bhalā lagtā hai

aisī be-rang bhī shāyad na ho kal kī duniyā

phuul se bachchoñ ke chehroñ se pata lagtā hai

dekhne vaalo mujhe us se alag mat jaano

yuuñ to har saaya hī paikar se judā lagtā hai

zard dhartī se harī ghaas kī koñpal phūTī

jaise ik ḳhema sar-e-dasht-e-balā lagtā hai

narm jhonke se ye ek zaKHm sa kya lagta hai

ai hawa kuchh tere daman mein chhupa lagta hai

haT ke dekhenge use raunaq-e-mahfil se kabhi

sabz mausam mein to har peD hara lagta hai

wo koi aur hai jo pyas bujhata hai meri

abr phaila hua daman-e-dua lagta hai

ai lahu main tujhe maqtal se kahan le jaun

apne manzar hi mein har rang bhala lagta hai

aisi be-rang bhi shayad na ho kal ki duniya

phul se bachchon ke chehron se pata lagta hai

dekhne walo mujhe us se alag mat jaano

yun to har saya hi paikar se juda lagta hai

zard dharti se hari ghas ki konpal phuTi

jaise ek KHema sar-e-dasht-e-bala lagta hai