nashat-e-dard ka dariya utarne wala hai

nashāt-e-dard kā dariyā utarne vaalā hai

maiñ is se aur vo mujh se ubharne vaalā hai

maiñ us kī narm nigāhī se ho gayā māyūs

vo merī sāda-dilī se mukarne vaalā hai

vo mere ishq meñ dīvāna-vār phirne lage

ye mo.ajiza to faqat farz karne vaalā hai

mire ḳhayāl kī parvāz se jo vāqif hai

vo āshnā hī mire par katarne vaalā hai

abhī abhī mire kuchh dost aane vaale haiñ

maiñ sochtā thā har ik zaḳhm bharne vaalā hai

fasīl-e-jism pe kuchh naqsh chhoḌ jā.egā

jo hādisa mire dil par guzarne vaalā hai

bas is ḳhayāl meñ bigḌā rahā maiñ barsoñ tak

ab ek din meñ koī kyā sudharne vaalā hai

vo ban ke ziist mire paas aa gayā hai 'amar'

ye vaqt mere liye ain marne vaalā hai

nashat-e-dard ka dariya utarne wala hai

main is se aur wo mujh se ubharne wala hai

main us ki narm nigahi se ho gaya mayus

wo meri sada-dili se mukarne wala hai

wo mere ishq mein diwana-war phirne lage

ye moajiza to faqat farz karne wala hai

mere KHayal ki parwaz se jo waqif hai

wo aashna hi mere par katarne wala hai

abhi abhi mere kuchh dost aane wale hain

main sochta tha har ek zaKHm bharne wala hai

fasil-e-jism pe kuchh naqsh chhoD jaega

jo hadisa mere dil par guzarne wala hai

bas is KHayal mein bigDa raha main barson tak

ab ek din mein koi kya sudharne wala hai

wo ban ke zist mere pas aa gaya hai 'amar'

ye waqt mere liye ain marne wala hai