nasheman jal chuka ahl-e-chaman hain sargiran humse

nasheman jal chukā ahl-e-chaman haiñ sargirāñ ham se

qafas se chhūT kar jaa.eñ kahāñ be-ḳhānumāñ ham se

sunā.eñ ab unheñ kis muñh se qissa hasrat-e-dil kā

hue haiñ ek harf-e-ārzū par bad-gumāñ ham se

jabīn-o-sañg-e-dar kā tafraqa yaksar miTā Daalā

qarīñ sajdoñ ne itnā kar diyā hai āstāñ ham se

jalāyā āshiyāñ phūñkā chaman phir bhī na chain aayā

talab ab aur kyā kartī haiñ āḳhir bijliyāñ ham se

karam thā ābloñ kā aur ināyat sāthiyoñ kī thī

zarā sī duur manzil thī ki chhuTā kārvāñ ham se

kabhī to jazba-e-ulfat dikhā.egā asar 'kaifī'

na pūchhī jā.egī kab tak hamārī dāstāñ ham se

nasheman jal chuka ahl-e-chaman hain sargiran hum se

qafas se chhuT kar jaen kahan be-KHanuman hum se

sunaen ab unhen kis munh se qissa hasrat-e-dil ka

hue hain ek harf-e-arzu par bad-guman hum se

jabin-o-sang-e-dar ka tafraqa yaksar miTa Dala

qarin sajdon ne itna kar diya hai aastan hum se

jalaya aashiyan phunka chaman phir bhi na chain aaya

talab ab aur kya karti hain aaKHir bijliyan hum se

karam tha aablon ka aur inayat sathiyon ki thi

zara si dur manzil thi ki chhuTa karwan hum se

kabhi to jazba-e-ulfat dikhaega asar 'kaifi'

na puchhi jaegi kab tak hamari dastan hum se