nasib-e-ishq dil-e-be-qarar bhi to nahin

nasīb-e-ishq dil-e-be-qarār bhī to nahīñ

bahut dinoñ se tirā intizār bhī to nahīñ

talāfī-e-sitam-e-rozgār kaun kare

tū ham-suḳhan bhī nahīñ rāz-dār bhī to nahīñ

zamāna pursish-e-ġham bhī kare to kyā hāsil

ki terā ġham ġham-e-lail-o-nihār bhī to nahīñ

tirī nigāh-e-taġhāful ko kaun samjhā.e

ki apne dil pe mujhe iḳhtiyār bhī to nahīñ

tū hī batā ki tirī ḳhāmushī ko kyā samjhūñ

tirī nigāh se kuchh āshkār bhī to nahīñ

vafā nahīñ na sahī rasm-o-rāh kyā kam hai

tirī nazar kā magar e'tibār bhī to nahīñ

agarche dil tirī manzil na ban sakā ai dost

magar charāġh-e-sar-e-rahguzār bhī to nahīñ

bahut fasurda hai dil kaun is ko bahlā.e

udaas bhī to nahīñ be-qarār bhī to nahīñ

tū hī batā tire be-ḳhānumāñ kidhar jaa.eñ

ki raah meñ shajar sāya-dār bhī to nahīñ

falak ne pheñk diyā barg-e-gul kī chhāñv se duur

vahāñ paḌe haiñ jahāñ ḳhār-zār bhī to nahīñ

jo zindagī hai to bas tere dard-mandoñ kī

ye jabr bhī to nahīñ iḳhtiyār bhī to nahīñ

vafā zarīya-e-iz.hār-e-ġham sahī 'nāsir'

ye kārobār koī kārobār bhī to nahīñ

nasib-e-ishq dil-e-be-qarar bhi to nahin

bahut dinon se tera intizar bhi to nahin

talafi-e-sitam-e-rozgar kaun kare

tu ham-suKHan bhi nahin raaz-dar bhi to nahin

zamana pursish-e-gham bhi kare to kya hasil

ki tera gham gham-e-lail-o-nihaar bhi to nahin

teri nigah-e-taghaful ko kaun samjhae

ki apne dil pe mujhe iKHtiyar bhi to nahin

tu hi bata ki teri KHamushi ko kya samjhun

teri nigah se kuchh aashkar bhi to nahin

wafa nahin na sahi rasm-o-rah kya kam hai

teri nazar ka magar e'tibar bhi to nahin

agarche dil teri manzil na ban saka ai dost

magar charagh-e-sar-e-rahguzar bhi to nahin

bahut fasurda hai dil kaun is ko bahlae

udas bhi to nahin be-qarar bhi to nahin

tu hi bata tere be-KHanuman kidhar jaen

ki rah mein shajar saya-dar bhi to nahin

falak ne phenk diya barg-e-gul ki chhanw se dur

wahan paDe hain jahan KHar-zar bhi to nahin

jo zindagi hai to bas tere dard-mandon ki

ye jabr bhi to nahin iKHtiyar bhi to nahin

wafa zariya-e-izhaar-e-gham sahi 'nasir'

ye karobar koi karobar bhi to nahin