natija dekhiye kuchh din mein kya se kya nikal aaya

natīja dekhiye kuchh din meñ kyā se kyā nikal aayā

kahīñ pe biij boyā thā kahīñ paudhā nikal aayā

raqam hai jis pe mere ābā-o-ajdād kā shajara

mire ghar kī khudā.ī meñ vahī katba nikal aayā

sunā hai aaj sab uryāñ nazar ā.eñge saḌkoñ par

maiñ apne ghar se ban kar aaj nā-bīnā nikal aayā

kuchh aise zāviye se aaj sūraj ne hukūmat kī

ke mere jism ke saaye kā bhī saaya nikal aayā

asā jab hazrat-e-mūsā ne maarā bahte paanī par

to paanī phaT gayā aur sāmne rasta nikal aayā

ai sapnoñ ke parindoñ hijratoñ se rok lo ḳhud ko

mirī āñkhoñ ke registān meñ chashma nikal aayā

tirī nazroñ ke auzāroñ ne mere jism-e-ḳhākī kā

jigar khodā to TuuTe dil kā kuchh malba nikal aayā

tū vo kam-zarf jo har dar pe dāman ko pasāre hai

maiñ vo ḳhuddār jo dariyā se bhī pyāsā nikal aayā

natija dekhiye kuchh din mein kya se kya nikal aaya

kahin pe bij boya tha kahin paudha nikal aaya

raqam hai jis pe mere aaba-o-ajdad ka shajara

mere ghar ki khudai mein wahi katba nikal aaya

suna hai aaj sab uryan nazar aaenge saDkon par

main apne ghar se ban kar aaj na-bina nikal aaya

kuchh aise zawiye se aaj suraj ne hukumat ki

ke mere jism ke saye ka bhi saya nikal aaya

asa jab hazrat-e-musa ne mara bahte pani par

to pani phaT gaya aur samne rasta nikal aaya

ai sapnon ke parindon hijraton se rok lo KHud ko

meri aankhon ke registan mein chashma nikal aaya

teri nazron ke auzaron ne mere jism-e-KHaki ka

jigar khoda to TuTe dil ka kuchh malba nikal aaya

tu wo kam-zarf jo har dar pe daman ko pasare hai

main wo KHuddar jo dariya se bhi pyasa nikal aaya