navāh-e-shauq meñ hai ik dayār-e-nik.hat-e-gul
zamīñ pe gul haiñ fazā meñ ġhubār-e-nik.hat-e-gul
ye shahr-e-gul-badnāñ sair-gāh-e-husn-e-tamām
kahīñ hai nahr kahīñ ābshār-e-nik.hat-e-gul
nasīm-e-sub.h bhī letī hai yaañ pe izn-e-ḳhirām
hai ye maqām maqām-e-qarār-e-nik.hat-e-gul
gumāñ ye hai kahīñ dīvār-e-rañg TuuT na jaa.e
hisār-e-rañg pe hai vo fishār-e-nik.hat-e-gul
yahāñ ke murġhān-e-ḳhush-ilhān-o-mehr-e-zar-afshāñ
haiñ nūr-o-naġhma yahāñ ham-kanār-e-nik.hat-o-gul
yahāñ kī qaus-e-quzah ko milā hai izn-e-davām
bahār-e-rañg dalīl-e-bahār-e-nik.hat-e-gul
ufuq pe nuur kā dariyā hai rañg kī kashtī
hai intizār meñ kis ke nigār-e-nik.hat-e-gul
kise ḳhabar hai ki 'bāqar' fidā-e-husn-e-bahār
yahīñ kahīñ hai ġharīb-e-dayār-e-nik.hat-e-gul
nawah-e-shauq mein hai ek dayar-e-nikhat-e-gul
zamin pe gul hain faza mein ghubar-e-nikhat-e-gul
ye shahr-e-gul-badnan sair-gah-e-husn-e-tamam
kahin hai nahr kahin aabshaar-e-nikhat-e-gul
nasim-e-subh bhi leti hai yan pe izn-e-KHiram
hai ye maqam maqam-e-qarar-e-nikhat-e-gul
guman ye hai kahin diwar-e-rang TuT na jae
hisar-e-rang pe hai wo fishaar-e-nikhat-e-gul
yahan ke murghan-e-KHush-ilhan-o-mehr-e-zar-afshan
hain nur-o-naghma yahan ham-kanar-e-nikhat-o-gul
yahan ki qaus-e-quzah ko mila hai izn-e-dawam
bahaar-e-rang dalil-e-bahaar-e-nikhat-e-gul
ufuq pe nur ka dariya hai rang ki kashti
hai intizar mein kis ke nigar-e-nikhat-e-gul
kise KHabar hai ki 'baqar' fida-e-husn-e-bahaar
yahin kahin hai gharib-e-dayar-e-nikhat-e-gul
Source:
Kulliyat-e-Baqir (Pg. 241)
-
Author:
Sajjad Baqir Rizvi
-
- Edition: 2010
- Publisher: Sayyed Mohammad Ali Anjum Rizvi
- Year of Publication: 2010
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.