naya dil naya hausla chahta hun

nayā dil nayā hausla chāhtā huuñ

har ik gaam shauq-āshnā chāhtā huuñ

na manzil na us kā patā chāhtā huuñ

faqat aap kā naqsh-e-pā chāhtā huuñ

vafāoñ ke badle vafā chāhtā huuñ

mirī sādgī dekh kyā chāhtā huuñ

jo zauq-e-junūñ aam kar de jahāñ meñ

maiñ vo naġhma-e-jāñ-fazā chāhtā huuñ

milā de jo aapas meñ logoñ ke dil ko

vatan meñ vo āb-o-havā chāhtā huuñ

jo uTh kar baras jaa.e dair-o-haram par

fazāoñ meñ aisī ghaTā chāhtā huuñ

har ik rind ke haath meñ jām-e-jam ho

kuchh is shaan kā mai-kada chāhtā huuñ

gul-o-lāla sehn-e-chaman meñ khilā kar

bahāroñ ke hāthoñ luTā chāhtā huuñ

naya dil naya hausla chahta hun

har ek gam shauq-ashna chahta hun

na manzil na us ka pata chahta hun

faqat aap ka naqsh-e-pa chahta hun

wafaon ke badle wafa chahta hun

meri sadgi dekh kya chahta hun

jo zauq-e-junun aam kar de jahan mein

main wo naghma-e-jaan-faza chahta hun

mila de jo aapas mein logon ke dil ko

watan mein wo aab-o-hawa chahta hun

jo uTh kar baras jae dair-o-haram par

fazaon mein aisi ghaTa chahta hun

har ek rind ke hath mein jam-e-jam ho

kuchh is shan ka mai-kada chahta hun

gul-o-lala sehn-e-chaman mein khila kar

bahaaron ke hathon luTa chahta hun