naya lahja ghazal ka misra-e-sani mein rakkha hai

nayā lahja ġhazal kā misra-e-sānī meñ rakkhā hai

huā ko muTThiyoñ meñ aag ko paanī meñ rakkhā hai

na jaane kyā samajh kar chakh liyā thā dāna-e-gandum

abhī ik bhuul ne ab tak pashemānī meñ rakkhā hai

vatan se duur huuñ meñ rizq kī ḳhātir mire maulā

magar bastī ko terī hī nigahbānī meñ rakkhā hai

safar meñ bhī darāmā.ī anāsir kaam aa.e haiñ

zabāñ kī chāshnī se sab ko hairānī meñ rakkhā hai

ġhazal kahne kā mausam 'qāsmī' ab ho gayā ruḳhsat

sukūn-e-qalb to us kī sanā-ḳhvānī meñ rakkhā hai

mohazzab shahr ke lambe safar se luuT aayā huuñ

salīqa zindagī kā ghar kī vīrānī meñ rakkhā hai

naya lahja ghazal ka misra-e-sani mein rakkha hai

hua ko muTThiyon mein aag ko pani mein rakkha hai

na jaane kya samajh kar chakh liya tha dana-e-gandum

abhi ek bhul ne ab tak pashemani mein rakkha hai

watan se dur hun mein rizq ki KHatir mere maula

magar basti ko teri hi nigahbani mein rakkha hai

safar mein bhi daramai anasir kaam aae hain

zaban ki chashni se sab ko hairani mein rakkha hai

ghazal kahne ka mausam 'qasmi' ab ho gaya ruKHsat

sukun-e-qalb to us ki sana-KHwani mein rakkha hai

mohazzab shahr ke lambe safar se luT aaya hun

saliqa zindagi ka ghar ki virani mein rakkha hai