naya lahja naya manzar naya pindar ho paida

nayā lahja nayā manzar nayā pindār ho paidā

mire naġhmoñ se aisī raunaq-e-gulzār ho paidā

yahī thā maslahat-andesh mausam kā taqāzā kyā

sadā-e-ḳhāmushī se ik na.ī guftār ho paidā

bikhar jaatā hai sab shīrāza-e-amn-o-sukūñ āḳhir

agar bastī meñ koī aadmī ḳhūñ-ḳhvār ho paidā

kahāñ bardāsht ho saktā hai ye mujh se kisī sūrat

samar pakne se pahle hī koī haqdār ho paidā

hamesha chheḌtā huuñ saaz apne kohna zaḳhmoñ kā

mire dil ke bayābāñ meñ koī gulzār ho paidā

yahī maiñ chāhtā huuñ ai ġhazāla dasht-o-sahrā meñ

ki ab mere junūñ se garmī-e-bāzār ho paidā

mazāmīñ ġhaib se aate nahīñ 'ātish' to kyā kachche

kahāñ se sher koī bhī mirā tah-dār ho paidā

naya lahja naya manzar naya pindar ho paida

mere naghmon se aisi raunaq-e-gulzar ho paida

yahi tha maslahat-andesh mausam ka taqaza kya

sada-e-KHamushi se ek nai guftar ho paida

bikhar jata hai sab shiraaza-e-amn-o-sukun aaKHir

agar basti mein koi aadmi KHun-KHwar ho paida

kahan bardasht ho sakta hai ye mujh se kisi surat

samar pakne se pahle hi koi haqdar ho paida

hamesha chheDta hun saz apne kohna zaKHmon ka

mere dil ke bayaban mein koi gulzar ho paida

yahi main chahta hun ai ghazala dasht-o-sahra mein

ki ab mere junun se garmi-e-bazar ho paida

mazamin ghaib se aate nahin 'atish' to kya kachche

kahan se sher koi bhi mera tah-dar ho paida