naya sauda naya dard-e-nihani le ke aaya hun

nayā saudā nayā dard-e-nihānī le ke aayā huuñ

na.ī us bazm se maiñ zindagānī le ke aayā huuñ

kuchh apnī nā-tavānī kuchh tirā pās-e-nazākat thā

nigāhoñ meñ mohabbat kī kahānī le ke aayā huuñ

tire jalve ke nazzāre ko ḳhālī haath kyā aatā

luTāne ko bahār-e-naujavānī le ke aayā huuñ

laboñ par mohr-e-ḳhāmoshī hai āñkheñ DabDabā.ī haiñ

asar-andāz apnī be-zabānī le ke aayā huuñ

ḳhudā-ma.alūm qāsid kyā sunā.e dil dhaḌaktā hai

ye kahtā hai ki paiġhām-e-zabānī le ke aayā huuñ

mizha par garm garm aañsū laboñ par sard sard aaheñ

fasāna dard kā ġham kī kahānī le ke aayā huuñ

sarishk-e-ḳhūñ dil-e-pur-dāġh afsurda tamannā.eñ

azal se ye matā.a-e-zindagānī le ke aayā huuñ

maqām-e-ḳhizr thā yā mai-kada thā kyā kahūñ kyā thā

jahāñ se maiñ hayāt-e-jāvedānī le ke aayā huuñ

'jalīl' abr-e-siyah kyā jhūmtā hai sabza-zāroñ par

ye kahtā hai ki āb-e-zindagānī le ke aayā huuñ

naya sauda naya dard-e-nihani le ke aaya hun

nai us bazm se main zindagani le ke aaya hun

kuchh apni na-tawani kuchh tera pas-e-nazakat tha

nigahon mein mohabbat ki kahani le ke aaya hun

tere jalwe ke nazzare ko KHali hath kya aata

luTane ko bahaar-e-naujawani le ke aaya hun

labon par mohr-e-KHamoshi hai aankhen DabDabai hain

asar-andaz apni be-zabani le ke aaya hun

KHuda-malum qasid kya sunae dil dhaDakta hai

ye kahta hai ki paigham-e-zabani le ke aaya hun

mizha par garm garm aansu labon par sard sard aahen

fasana dard ka gham ki kahani le ke aaya hun

sarishk-e-KHun dil-e-pur-dagh afsurda tamannaen

azal se ye mataa-e-zindagani le ke aaya hun

maqam-e-KHizr tha ya mai-kada tha kya kahun kya tha

jahan se main hayat-e-jawedani le ke aaya hun

'jalil' abr-e-siyah kya jhumta hai sabza-zaron par

ye kahta hai ki aab-e-zindagani le ke aaya hun