naya shagufa ishaara-e-yar par khila hai

nayā shagūfa ishāra-e-yār par khilā hai

gulāb ab ke chaman kī dīvār par khilā hai

ye kaisī añgḌā.ī lī hai ehsās-e-zindagī ne

masīh kā rañg rū-e-bīmār par khilā hai

nafī kā jaadū jagā rahī haiñ tilismī āñkheñ

vo harf-e-matlab fasīl-e-izhār par khilā hai

kitāb-e-ruḳh hai hijāb-e-taqdīs-e-husn-e-jānāñ

ye raaz kaisā mazāq-e-dīdār par khilā hai

bahār-āgīñ hayāt-afroz phuul ban kar

lahū kā chhīñTā qabā-e-īsār par khilā hai

mujhe banāyā gayā thā ḳhāmoshiyoñ kā paikar

ye ġhuncha-e-lab kisī ke isrār par khilā hai

'sabā' kā zauq-e-suḳhan nigār-e-ġhazal ke haq meñ

vo kaalā til hai jo gore ruḳhsār par khilā hai

naya shagufa ishaara-e-yar par khila hai

gulab ab ke chaman ki diwar par khila hai

ye kaisi angDai li hai ehsas-e-zindagi ne

masih ka rang ru-e-bimar par khila hai

nafi ka jadu jaga rahi hain tilismi aankhen

wo harf-e-matlab fasil-e-izhaar par khila hai

kitab-e-ruKH hai hijab-e-taqdis-e-husn-e-jaanan

ye raaz kaisa mazaq-e-didar par khila hai

bahaar-agin hayat-afroz phul ban kar

lahu ka chhinTa qaba-e-isar par khila hai

mujhe banaya gaya tha KHamoshiyon ka paikar

ye ghuncha-e-lab kisi ke israr par khila hai

'saba' ka zauq-e-suKHan nigar-e-ghazal ke haq mein

wo kala til hai jo gore ruKHsar par khila hai