naza mein wo mere pahlu se gae dil ki tarah

naza.a meñ vo mire pahlū se ga.e dil kī tarah

maiñ taḌaptā hī rahā farsh pe bismil kī tarah

ek pahlū meñ rahe dil mirā bismil kī tarah

ek pahlū meñ raheñ aap mire dil kī tarah

kuchh agar jazb-e-mohabbat kā asar ho jaa.e

tum bhī betāb ho pahlū meñ mire dil kī tarah

kabhī sīdhe na hue yaar ke tevar mujh se

bal na abrū se gayā ḳhanjar-e-qātil kī tarah

un ke abrū kā ishāra ye hai har āshiq se

sar-nigūñ rahtā huuñ maiñ ḳhanjar-e-qātil kī tarah

ḳhuun pī kar lab-e-sofār ye kahtā hai mirā

surḳh-rū rahtā huuñ maiñ ḳhanjar-e-qātil kī tarah

o kamāñ-dār tirā tīr-e-nazar khāyā hai

dil phaḌaktā hai mirā tā.ir-e-bismil kī tarah

sārbāñ najd meñ ḳhālī jo nazar aa.ī use

dil-e-majnūñ tah-o-bālā huā mahmil kī tarah

āshiqoñ meñ tire ai mah na hameñ kyoñ ho faroġh

daaġh dil meñ hai hamāre mah-e-kāmil kī tarah

hal kiyā uqda-e-lā-hal ko baḌī hikmat se

tum ne kholī hai girah dil kī anāmil kī tarah

kārvāñ ko mire kyūñkar ho ḳhabar ġhurbat meñ

dūr-uftāda huuñ gard-e-rah-e-manzil kī tarah

pāsbānoñ kī tarah shab ko jo kartā huuñ fuġhāñ

dost rakhte haiñ mujhe sab sag-e-manzil kī tarah

hai yam-e-ashk hī se un kī baqā aur fanā

āñkheñ merī haiñ habāb-e-lab-e-sāhil kī tarah

ġhuncha mere dil-e-basta kā jo khil jaatā hai

chahchahe baaġh meñ kartā huuñ anādil kī tarah

be-qarārī shab-e-furqat kī na pūchho mujh se

barq-o-sīmāb bhī taḌpe na mire dil kī tarah

haath aa.e jo tire tiir kā paikāñ mujh ko

apne siine meñ rakhūñ maiñ jigar-o-dil kī tarah

mahfil-e-aish-o-tarab se bhī nikālā mujh ko

kaf-e-afsos malūñ kyoñ na jalājil kī tarah

qais kahtā thā kahūñ kyoñ na anā lailā maiñ

yaad dil meñ hai mirī sāhib-e-mahmil kī tarah

zoraq-e-umr baḌhī rāh-e-ḳhudā meñ de kar

naav ḳhushkī meñ chalī kashtī-e-sā.il kī tarah

qatl ai yaar karegī ye tavāzo terī

jhuk ke miltā hai gale ḳhanjar-e-qātil kī tarah

ujḌe pahlū ko mire kījiye ābād huzūr

bevafā aap na ho jaa.eñ mire dil kī tarah

ye to āsān hai 'fāḳhir' ho zamīñ kaisī hī saḳht

kahne vaale ko nahīñ koī bhī mushkil kī tarah

naza mein wo mere pahlu se gae dil ki tarah

main taDapta hi raha farsh pe bismil ki tarah

ek pahlu mein rahe dil mera bismil ki tarah

ek pahlu mein rahen aap mere dil ki tarah

kuchh agar jazb-e-mohabbat ka asar ho jae

tum bhi betab ho pahlu mein mere dil ki tarah

kabhi sidhe na hue yar ke tewar mujh se

bal na abru se gaya KHanjar-e-qatil ki tarah

un ke abru ka ishaara ye hai har aashiq se

sar-nigun rahta hun main KHanjar-e-qatil ki tarah

KHun pi kar lab-e-sofar ye kahta hai mera

surKH-ru rahta hun main KHanjar-e-qatil ki tarah

o kaman-dar tera tir-e-nazar khaya hai

dil phaDakta hai mera tair-e-bismil ki tarah

sarban najd mein KHali jo nazar aai use

dil-e-majnun tah-o-baala hua mahmil ki tarah

aashiqon mein tere ai mah na hamein kyon ho farogh

dagh dil mein hai hamare mah-e-kaamil ki tarah

hal kiya uqda-e-la-hal ko baDi hikmat se

tum ne kholi hai girah dil ki anamil ki tarah

karwan ko mere kyunkar ho KHabar ghurbat mein

dur-uftada hun gard-e-rah-e-manzil ki tarah

pasbanon ki tarah shab ko jo karta hun fughan

dost rakhte hain mujhe sab sag-e-manzil ki tarah

hai yam-e-ashk hi se un ki baqa aur fana

aankhen meri hain habab-e-lab-e-sahil ki tarah

ghuncha mere dil-e-basta ka jo khil jata hai

chahchahe bagh mein karta hun anadil ki tarah

be-qarari shab-e-furqat ki na puchho mujh se

barq-o-simab bhi taDpe na mere dil ki tarah

hath aae jo tere tir ka paikan mujh ko

apne sine mein rakhun main jigar-o-dil ki tarah

mahfil-e-aish-o-tarab se bhi nikala mujh ko

kaf-e-afsos malun kyon na jalajil ki tarah

qais kahta tha kahun kyon na ana laila main

yaad dil mein hai meri sahib-e-mahmil ki tarah

zoraq-e-umr baDhi rah-e-KHuda mein de kar

naw KHushki mein chali kashti-e-sail ki tarah

qatl ai yar karegi ye tawazo teri

jhuk ke milta hai gale KHanjar-e-qatil ki tarah

ujDe pahlu ko mere kijiye aabaad huzur

bewafa aap na ho jaen mere dil ki tarah

ye to aasan hai 'faKHir' ho zamin kaisi hi saKHt

kahne wale ko nahin koi bhi mushkil ki tarah