nazare ke qabil nazar ho to le

nazāre ke qābil nazar ho to le

nazar ko ḳhud apnī ḳhabar ho to le

añdhere ujāle guzar ho to le

shab-e-tīra-sāmāñ basar ho to le

abhī nā-rasā.ī pe kyoñ guftugū

duāoñ meñ paidā asar ho to le

nazar vāsil-e-nūr ho jā.egī

sazā-vār-e-ḳhvāb-e-sahar ho to le

nazāre kā imkāñ bhī mushkil nahīñ

shu.ūr-e-nazar mo'atabar ho to le

bahar-kaif dil dil se mil jā.egā

nazar ke muqābil nazar ho to le

chale ā.eñge log pursish ko bhī

zarā haal be-hāl-tar ho to le

tajassus kī rāheñ bhī khul jā.eñgī

junūñ aql kā rāhbar ho to le

mohabbat ke qābil bhī hoñge 'rishī'

dayār-e-vafā se guzar ho to le

nazare ke qabil nazar ho to le

nazar ko KHud apni KHabar ho to le

andhere ujale guzar ho to le

shab-e-tira-saman basar ho to le

abhi na-rasai pe kyon guftugu

duaon mein paida asar ho to le

nazar wasil-e-nur ho jaegi

saza-war-e-KHwab-e-sahar ho to le

nazare ka imkan bhi mushkil nahin

shuur-e-nazar mo'atabar ho to le

bahar-kaif dil dil se mil jaega

nazar ke muqabil nazar ho to le

chale aaenge log pursish ko bhi

zara haal be-haal-tar ho to le

tajassus ki rahen bhi khul jaengi

junun aql ka rahbar ho to le

mohabbat ke qabil bhi honge 'rishi'

dayar-e-wafa se guzar ho to le