nazar aati hai dur ki surat

nazar aatī hai duur kī sūrat

aañkh meñ hai huzūr kī sūrat

ek ye bhī hai nuur kī sūrat

dekh lī sham-e-tūr kī sūrat

kyuuñ na ho jaan kā azaab ye jism

tañg zindāñ qubūr kī sūrat

sar-e-turbat koī hai fitna-e-hashr

huī paidā futūr kī sūrat

ḳhānqa meñ parī thī shīshe kī

ban ke aa.ī jo huur kī sūrat

aa gayā kyā sū-e-qafas sayyād

ho ga.ī kyā tuyūr kī sūrat

phirtī hai aañkh meñ ba-sad-hasrat

ab dil-e-nā-subūr kī sūrat

ek hai ek kibriyā.ī meñ

uf vo us ke ġhurūr kī sūrat

hashr-zā uf vo suur kī āvāz

vo sarāfīl-o-sūr kī sūrat

baaḌh talvār kī sirāt kā pul

aur mushkil ubuur kī sūrat

sho.ala-zār ek lāla-zār hai ek

sāmne nār-o-nūr kī sūrat

muztarib apne haal par har ek

haa.e har nā-subūr kī sūrat

fard-e-isyāñ navishta-e-taqdīr

haa.e har be-qusūr kī sūrat

aas us ke karam kī qahr kā Dar

jo ho rabb-e-ġhafūr kī sūrat

ai maiñ qurbān shān-e-rahmat ke

nazar aa.ī huzūr kī sūrat

kis ko parvā-e-kausar-o-tasnīm

huī paidā surūr kī sūrat

sadqe kyā jald hashr meñ badlī

mujh sarāpā qusūr kī sūrat

ho mubārak siyāhkār 'riyāz'

nuur kī shakl nuur kī sūrat

nazar aati hai dur ki surat

aankh mein hai huzur ki surat

ek ye bhi hai nur ki surat

dekh li sham-e-tur ki surat

kyun na ho jaan ka azab ye jism

tang zindan qubur ki surat

sar-e-turbat koi hai fitna-e-hashr

hui paida futur ki surat

KHanqa mein pari thi shishe ki

ban ke aai jo hur ki surat

aa gaya kya su-e-qafas sayyaad

ho gai kya tuyur ki surat

phirti hai aankh mein ba-sad-hasrat

ab dil-e-na-subur ki surat

ek hai ek kibriyai mein

uf wo us ke ghurur ki surat

hashr-za uf wo sur ki aawaz

wo sarafil-o-sur ki surat

baDh talwar ki siraat ka pul

aur mushkil ubur ki surat

shoala-zar ek lala-zar hai ek

samne nar-o-nur ki surat

muztarib apne haal par har ek

hae har na-subur ki surat

fard-e-isyan nawishta-e-taqdir

hae har be-qusur ki surat

aas us ke karam ki qahr ka Dar

jo ho rabb-e-ghafur ki surat

ai main qurban shan-e-rahmat ke

nazar aai huzur ki surat

kis ko parwa-e-kausar-o-tasnim

hui paida surur ki surat

sadqe kya jald hashr mein badli

mujh sarapa qusur ki surat

ho mubarak siyahkar 'riyaz'

nur ki shakl nur ki surat