nazar bacha ke nazar se guzar gaya wo shaKHs

nazar bachā ke nazar se guzar gayā vo shaḳhs

mire vajūd meñ lekin utar gayā vo shaḳhs

jo zindagī kī alāmat thā ik zamāne se

sunā hai aaj ḳhud apne meñ mar gayā vo shaḳhs

kahīñ bhī kam na huā us kā dard-e-tanhā.ī

samundaroñ se bhī pyāsā guzar gayā vo shaḳhs

na jaane kab se sañbhāle hue thā jo ḳhud ko

na jaane aaj ye kaise bikhar gayā vo shaḳhs

tulūa-e-dard huā āftāb-e-nau kī tarah

shab-e-alam kī fazā meñ nikhar gayā vo shaḳhs

sajā.e ashk zamāne ke apnī āñkhoñ meñ

magar ḳhud apne tabassum se Dar gayā vo shaḳhs

pukārtī thī use be-charāġh rāhguzar

tamām karke jab apnā safar gayā vo shaḳhs

har ek chehra hai be-chehragī kā ā.īna

abhī jo 'badr' yahāñ thā kidhar gayā vo shaḳhs

nazar bacha ke nazar se guzar gaya wo shaKHs

mere wajud mein lekin utar gaya wo shaKHs

jo zindagi ki alamat tha ek zamane se

suna hai aaj KHud apne mein mar gaya wo shaKHs

kahin bhi kam na hua us ka dard-e-tanhai

samundaron se bhi pyasa guzar gaya wo shaKHs

na jaane kab se sanbhaale hue tha jo KHud ko

na jaane aaj ye kaise bikhar gaya wo shaKHs

tulua-e-dard hua aaftab-e-nau ki tarah

shab-e-alam ki faza mein nikhar gaya wo shaKHs

sajae ashk zamane ke apni aankhon mein

magar KHud apne tabassum se Dar gaya wo shaKHs

pukarti thi use be-charagh rahguzar

tamam karke jab apna safar gaya wo shaKHs

har ek chehra hai be-chehragi ka aaina

abhi jo 'badr' yahan tha kidhar gaya wo shaKHs