nazar har shai ko har zarre ko apna dil samajhta hun

nazar har shai ko har zarre ko apnā dil samajhtā huuñ

isī dīvāngī ko hosh kā hāsil samajhtā huuñ

Duboyā jazba-e-māsūm kī is ḳhush-farebī ne

mujhe dād-e-vafā deñge sar-e-mahfil samajhtā huuñ

ilāj-e-dard kis kāfir ko hai darkār chārāgar

mohabbat kī amānat hai ise maiñ dil samajhtā huuñ

tabī.at ho ga.ī hai is qadar ḳhūgar havādis kī

safīna mauj ko tūfān ko sāhil samajhtā huuñ

bujhā detā huuñ 'tālib' apnī āñkheñ us kī rāhoñ meñ

kisī ahl-e-hunar ko jab bhī is qābil samajhtā huuñ

nazar har shai ko har zarre ko apna dil samajhta hun

isi diwangi ko hosh ka hasil samajhta hun

Duboya jazba-e-masum ki is KHush-farebi ne

mujhe dad-e-wafa denge sar-e-mahfil samajhta hun

ilaj-e-dard kis kafir ko hai darkar chaaragar

mohabbat ki amanat hai ise main dil samajhta hun

tabiat ho gai hai is qadar KHugar hawadis ki

safina mauj ko tufan ko sahil samajhta hun

bujha deta hun 'talib' apni aankhen us ki rahon mein

kisi ahl-e-hunar ko jab bhi is qabil samajhta hun